Монгол Улсын Гавьяат тамирчин Э.Цэндбаатар мэргэжлийн боксын ээлжит тулаанаа Азербайжаны боксчны эсрэг хийлээ. Э.Цэндбаатар тулааны хоёрдугаар үед Азербайжаны боксчин Рауф Агаевыг хүнд цохилтоор буулган авав. Бид МУГТ Э.Цэндбаатарын ээж Г.Болормаатай холбогдож, баярын сэтгэгдлийг нь хуваалцлаа. Тэрбээр хүүгээ амжилттай, өөртөө итгэлтэй, зорилгодоо хүрэхийг харахыг чин сэтгэлээсээ хүсэж буйгаа илэрхийлсэн юм.

-Хүү тань ялалт байгууллаа. Баяр хүргэе?

         -Миний муу хүү биеэ даагаад, элдэв муу зуршлаас хол, ангид өөрийнхөө, бусдын хүчээр зүтгэсээр байгаад дахин ялалт байгууллаа. Сэтгэл санаа сайхан байлгүй яах вэ. Эх, эцэг гэдэг хүмүүс чинь үр хүүхэд нь сайхан явахад жаргаж, муу явахад өмнөөс нь шаналж, хамтдаа ачааг нь үүрч явдаг шүү дээ. Нөхөр бид хоёрт үүнээс илүү том баяр, жаргал гэж алга даа.

-Өмнөх тулаануудаас юугаараа онцлог байсан бэ. Хүүгээрээ бахархаж суув уу?

         -Би хүүгээ өөртөө итгэлтэй байхыг нь, ямар ч стресс, дарамтгүй байхыг нь харах дуртай. Өмнөх тулаанаас илүү миний хүү өөртөө итгэлтэй харагдаж байснаараа онцлог байлаа. Тоглолтын талбайд гарч ирэхэд нь л хүүгээ ялах юм байна гэдгийг мэдсэн. Бодох, санах, шаналах юмгүй өөртөө итгэлтэй талбайд гарч ирнэ лээ.

-Хүүгийнхээ тулааныг нь үзэж чаддаг уу?  

        -Өмнө нь бол үзэж чаддаггүй байлаа. Зүрх хаагдчих гээд байгаа юм шиг санагддаг байсан.Хүүгээ доошоо хараад, нүд нь тогтож чадахгүй, тайван биш байхыг нь харах шиг хэцүү зүйл байхгүй. Тэгээд тоглолтыг нь тогтож үзэж чаддаггүй байсан юм. Харин мэргэжлийн бокст тулалдсанаасаа хойш миний хүү тайван, өөртөө итгэлтэй болсон. Тийм учраас тоглолт бүрийг нь шимтэн үзэж, цохилт, довтлолт бүрд нь хамтдаа байдаг болсон доо. Өмнө нь хүүгийн тоглолтыг үзэж байхдаа гэрийнхэн маань хоорондоо юм дуугардаггүй байсан бол одоо ярилцаж, “Дахиад булт, дахиад урагшлаад гараа явуулаарай. Хөл дээрээ ажил” зэргээр ярилцаж, инээлддэг болсон шүү дээ. Хүүгээ дагаад бидний сэтгэл санаа ч сэргээд сайхан байна. Миний муу хүү зорилгодоо хүрэх гээд зүтгээд л байна даа. Ямар ч гэсэн зорилгодоо хүрнэ гэдэгт нь итгэж сууна.

-Хүү нь хэзээ ирэх вэ?

         -Энэ сарын 25-нд ирэх юм гэсэн. Одоо ирээд бэлтгэлдээ ороод, дөрөвдүгээр сард дахин тулаан хийнэ. Тулааныг нь тэсэн ядан хүлээж сууна даа. Хамгийн гол нь бэртэл, гэмтэлгүй байх нь чухал. Сая Монголоос явахад нь нарийн шинжилгээ авсан гэсэн.

-Та хэд байрандаа орсон уу?

         -Одоогоор ороогүй байгаа. Миний хүү ирээд орох байх. Байрандаа орохоороо хоёр охиндоо, эхнэртээ санаа зовох зүйлгүй болоод бүүр ч амрах байх даа. Миний хүүг дэмжсэн, хамтарч ажилладаг Монголынхоо ард түмэнд баярлалаа гэж хэлмээр байна.

-Тэмцээнд явах зардал, мөнгөө хаанаас зохицуулж байгаа вэ?

              -Хувиасаа л гаргаж байгаа. Зарим үедээ өөрт байгаагаа, найз нөхдийнхөө дэмжлэгээр болж л байна даа.