Хүн төрөлхтний эв найрамдлын бэлгэ тэмдэг болсон өвлийн олимпын XXIV дэх удаагийн “Бээжин-2022” наадам өнгөрсөн баасан гарагт албан ёсоор эхэлсэн. Энэ удаагийн өвлийн олимпын наадамд дэлхийн 91 орны 2871 тамирчин өрсөлдөж байгаа бөгөөд өвлийн спортын үндсэн долоо, шинэ төрлүүдэд 109 багц медалийн төлөө 16 хоногийн турш өрсөлдөнө.

“НЭГ ДЭЛХИЙ, НЭГ ГЭР БҮЛ”

           “Бээжин-2022” өвлийн олимпын наадам цар хүрээ, нээлтийн ёслолоо ч “сүртэй” хийлээ. Наадам болохоос өмнө БНХАУ-ын дарга Ши Жиньпин “БНХАУ сүүлийн 1000 жилд болоогүй олимпын наадмын нээлтийг хийх болно” гэж хэлж байсан. Ши Жиньпиний хэлсэнтэй адил шинэ өнгө төрх, дэвшилтэт технологийг олон орны уламжлалтай хослуулсан нээлтийн ёслол үзэгчдийн сэтгэлд хүрсэн, тааламжтай үзүүлбэр байж чадсан.

Мөн “Бээжин-2022” өвлийн олимп нь түүхэн дэх хамгийн олон өвлийн спортын шинэ төрөл нэмж, оролцуулж байгаагаараа онцлог болж байна. Үүнд:

• Эрэгтэй freestyle
• Эмэгтэй big air
• Бобслейний эмэгтэй ганцаарчилсан
• Трамплин
• Snowboard
• Шорт трек
• Холимог багийн freestyle aerials төрлийг шинээр нэмж оруулсан.

Гэхдээ “Бээжин-2022” өвлийн олимпын наадмын шинэ, шинэлэг зүйлс зөвхөн үүгээр дуусахгүй. Өвлийн олимпын түүхэнд хамгийн олон буюу 19 мянган сайн дурын ажилтан эгнээндээ нэгтгэсэн.

           Олимпын наадмын “Хурднаас хурдан, өндрөөс өндөр, хүчтэйгээс хүчтэй” уриа 100 гаруй жилийн турш үргэлжилж өнгөрсөн зун болсон Олон улсын олимпын хорооны чуулганаар уриа үгийг өөрчилсөн. Чуулганаар уриа үгэнд “Хамтдаа” гэх үгийг нэмж, “Хамтдаа хурднаас хурдан, өндрөөс өндөр, хүчтэйгээс хүчтэй” болсон юм.

Тэгвэл “Бээжин-2022” өвлийн олимпын наадам ч мөн дээрх уриа үгнээс гадна дахин нэгэн уриатайгаар эхэлсэн. Олон улсын олимпын хорооны ерөнхийлөгч Томас Бах болон БНХАУ-ын дарга Ши Жиньпин нар “Бээжин-2022” өвлийн олимпын наадмыг “Нэг дэлхий, нэг гэр бүл” уриан дор зохион байгуулж буйг нээлтийн ёслолын үеэр онцлон хэлсэн юм.

           Мөн БНХАУ нь хүн төрөлхтний түүхэн дэх анхны зуны болон өвлийн олимпын наадмыг эх орондоо зохион байгуулсан улс болоод байгаа билээ.

-“БЭЭЖИН-2022” НААДМЫН АНХНЫ АЛТАН МЕДАЛЬТАН БОЛОН МЕДАЛИЙН ХҮСНЭГТ ТЭРГҮҮЛЭГЧ ОРОН-

           “Бээжин-2022” өвлийн олимпын наадам албан ёсоор нээлтээ хийснээс хойш 20 цагийн дараа анхны алтан медальтнаа шалгаруулав. Нээлтээс хойш өвлийн спортын үндсэн долоон төрлийн тэмцээнүүд эхэлсэн бөгөөд эмэгтэйчүүдийн цанын 15 км-ын төрөл хамгийн эхэнд шилдгүүдээ шалгаруулсан юм. Улмаар тус төрөл Норвеги Улсыг төлөөлөн оролцсон Тереке Йохауг алтан медаль хүртэж, тус наадмын анхны алтан медальтан болсон.

Харин хоёр өдрийн турш үргэлжилсэн “Бээжин-2022” наадмаас дахин онцлох зүйл нь Шинэ Зеландын түүхийг бичсэн, өвлийн олимпын түүхийг эвдсэн хоёр алтан медальтан байв.

           “Бээжин-2022” өвлийн олимпын наадмын эрэгтэйчүүдийн тэшүүрийн таван км-ын төрөлд өрсөлдсөн Нидерландын тамирчин Патрик Роест олимпын шинэ дээд амжилт тогтоож, алтан медаль хүртсэн. Тэрбээр эрэгтэйчүүдийн тэшүүрийн таван км-ын зайн өмнөх дээд амжилт болох Шведийн нэрт тамирчин Нилс ван дер Поэлийн амжилтаас 0.47 секундын өмнө барианд орсон юм. Хагас секундын хугацааг алтан медалиас илүүтэй үнэлсэн нидерландчуудын баярын жагсаал үргэлжилсээр.

           Тэгвэл олимпын түүхэн амжилтыг эвдээгүй ч, эх орныхоо түүхийг бичсэн нэг үйл явдал тохиосон юм. “Бээжин-2022” өвлийн олимпын наадмын эмэгтэйчүүдийн слоупстайлд төрөлд өрсөлдсөн Шинэ Зеландын тамирчин Зой Садовски-Синнотт алтан медаль хүртэж, Шинэ Зедандын өвлийн олимпын түүхэн дэх анхны алтан медалийг хүртсэн юм. Өдгөө 20 настай Шинэ Зеландын түүхийг бичсэн тамирчинд хамгийн түрүүнд тус улсын Шадар сайд баяр хүргэж, маш том бай, шагнал амласан аж.

Өнгөрсөн баасан гарагт албан ёсоор нээлтээ хийж, хоёр өдрийн турш үргэлжилсэн “Бээжин-2022” өвлийн олимпын наадмын медалийг хүснэгтийг Норвеги Улс хоёр алт, нэг хүрэл медальтайгаар тэргүүлж байна. Харин араас нь Швед Улс хоёр алт, ОХУ-ын Олимпын хороо нэг алт, хоёр мөнгө, хоёр хүрэл медалтайгаар удаалж байгаа юм.