Жил бүрийн битүүний өдөр уламжлал болгон зохион байгуулдаг Цагаан сарын барилдааныг хүсэн хүлээдэг бөхийн хорхойтон олон бий. Харин цар тахлын үеийн нөхцөл байдалтай холбоотойгоор өнгөрсөн жил үзэгч олны хүсэн хүлээдэг Цагаан сарын барилдааныг зохион байгуулаагүй.

           Тэгвэл энэ жил сайжруулагч хэмээх усан барс жилийн сар шинийн баярт зориулсан барилдаан болж буй. Эргэлт.мн мэдээллийн сайт бөхийн хорхойтнууддаа зориулан Цагаан сарын барилдааны тухай сонирхолтой баримтуудыг хүргэж байна.

Анхны цагаан сарын барилдаанд дархан аварга Ж.Мөнхбат түрүүлжээ

           Анх Цагаан сарын барилдааныг 1963 оноос “Нэгдэлчдийн баярын барилдаан” гэх нэрээр зохион байгуулж эхэлсэн. Хамгийн анхны “Нэгдэлчдийн баярын барилдаан”-д нийт 64 бөх зодоглосноос дархан аварга Ж.Мөнхбат түрүүлж, аварга Ч.Бээжин үзүүрлэжээ.

Цагаан сарын барилдаанд дархан аварга Б.Бат-Эрдэнэ хамгийн олон түрүүлсэн

Монгол Улсын Хөдөлмөрийн баатар, Хэнтий аймгийн Өмнөдэлгэр сумын харьяат, дархан аварга Б.Бат-Эрдэнэ Цагаан сарын барилдаанд хамгийн олон түрүүлсэн амжилтыг эзэмшдэг. Тэрбээр Цагаан сарын барилдаанд нийт 13 удаа түрүүлэхдээ завсаргүй 11 жил түрүүлсэн байна. Түүний 11 удаагийн завсаргүй түрүүг 1999 онд дархан аварга А.Сүхбат учраа тааран зогсоож байсан юм.

Дархан аварга Д.Цэрэнтогтох Цагаан сарын барилдаанд таван удаа үзүүрлэжээ

Цагаан сарын барилдаанд хамгийн олон удаа үзүүрлэсэн амжилтыг дархан аварга Д.Цэрэнтогтох эзэмшдэг. Тэрбээр 1979, 1981, 1985, 1987, 1990 онд  үзүүрлэж байжээ.

Улсын аварга Ч.Санжаадамба, харцага Ш.Мөнгөнбаатар нар аймгийн цолтойдоо Цагаан сарын барилдаанд түрүүлж байв

Аймгийн цолтойдоо Сар шинийн барилдаанд түрүүлж, үзэгч олныгоо баясгасан хоёрхон хүчтэн бий. 2010 онд улсын аварга Ч.Санжаадамба цэргийн арслан цолтойдоо тэргүүлсэн бол түүний дараах жил нь улсын харцага Ш.Мөнгөнбаатар Аймгийн арслан цолтойдоо түрүүлсэн аж.

Цагаан сарын барилдаанд аварга цолтойдоо түрүүлсэн 14 бөх бий

Цагаан сарын барилдаанд Улсын аварга цолондоо хүрснээс хойш түрүүлсэн нийт 14 бөх байдаг. Үүнд дархан аварга Д.Дамдин, Х.Баянмөнх, Д.Цэрэнтогтох, Б.Бат-Эрдэнэ, А.Сүхбат, Г.Өсөхбаяр, даян аварга С.Цэрэн, улсын аварга Д.Хадбаатар, О.Балжинням, Д.Сумъяабазар, С.Мөнхбат, Г.Эрхэмбаяр, Ч.Санжаадамба нар багтана.

Д.Хадбаатар аваргын Цагаан сарын барилдааны түрүү, үзүүрт гурван жил дараалан Өвөрхангай аймгийн бөхтэй тунан барилдсан түүх

Улсын аварга Д.Хадбаатар улсын арслан цолтой байхдаа Цагаан сарын барилдаанд гурван удаа түрүүлэхдээ үзүүр, түрүүний барилдаанд бүгдэд нь Өвөрхангай аймгийн харьяат бөхчүүдтэй тааран барилдсан нь өдгөө хачирхалтай баримт болон үлджээ. Тэрээр 1980 онд Өвөрхангай аймгийн Хужирт сумын харьяат улсын заан Д.Долгорсүрэн, 1984 онд Хужирт сумын харьяат улсын заан Ё.Ишгэн, түүний дараа жил Нарийнтээл сумын харьяат дархан аварга Д.Цэрэнтогтох нартай учраа тааран барилдсан юм.

Харцага О.Хангай аймгийн цолтой байхдаа Цагаан сарын барилдаанд хоёр удаа үзүүрлэв

Улсын харцага О.Хангай аймгийн цолтойдоо Цагаан сарын барилдаанд хоёр удаа буюу 2014, 2017 онд үзүүрлэсэн. Харин 1998 онд Улсын арслан Б.Ганбат, 2000 онд Улсын харцага Ц.Магалжав нар тус тус нэг удаа үзүүрлэсэн амжилт үзүүлж байжээ.