-ТЭД АНХНЫ ТЭМЦЭЭНЭЭ ХОЁР ХҮРЭЛ МЕДАЛЬ ХҮРТЭЖ ЭХЛҮҮЛЛЭЭ-

       Монголын жүдо бөхийн шигшээ багт аатай барилддаг хэдэн  хүүхэд орж ирлээ дээ. Нас нь залуухан юм. Дөнгөж л 20 хүрч байгаа юм билээ. Өмнө нь дэлхийн  томоохон тэмцээн уралдаанд явж, дэвжээн дээр зогсож үзээгүй. Нэр алдартай бөхчүүдийн энгэр ханцуйнаас атгаж, уран мэхийг уралдуулан хийж амжаагүй битүү “морьд” гэсэн үг. Гэхдээ нялх балчир наснаасаа жүдогийн татами дээр өнжиж, тив дэлхий, олимпын медальт ах нартаа цээжиндээ цус амтагдтал шидүүлж, ялагдаж, бас ялж үзсэн тагчигнасан хэдэн хүүхэд харагдана. Тэдний анхны тэмцээн нь “Португалийн Гран-При-2022” тэмцээн байлаа. Тус тэмцээнд эрэгтэй багаас  Б.Баасанхүү -48 кг, Г.Сод-Эрдэнэ -66 кг, Э.Сумъяабазар -60 кг, Б.Цогт-очир 60 кг, Б.Наранмандах 66 кг, эмэгтэйгээс О.Оюунчимэг 57 кг, Ц.Гал-Од 52 кг, А.Адьяасүрэн +78, Б.Баасанхүү 48 кг-д барилдсан.

            Монголын жүдо бөхийн холбооныхон “Ямар авч үзээгүй медаль, барилдаж үзээгүй дэвжээ биш. Шигшээ багт шинээр орж байгаа залуусыг энэ удаад явуулах нь зөв” гэж шийдсэн бололтой. Анхны тэмцээндээ орсон залуухан жүдочид “Бид дэлхийн дэвжээн дээр хэдэн жил босоо барилдана. Монголын жүдо бөхөд шинэ салхи сэвэлзэж, дараагийн үеийнхэн гарч ирлээ” гэдгийг тун даруухнаар тунхаглан зарлачихаад ирлээ.  

            Одоо дэлхийн улс орны жүдо бөхийн холбооныхон манай залуу тамирчдыг яаж барилддаг, ямар мэх хийж байгаа, биеийн аль хэсэгтээ уртай, бяртай, барилдах онцлог болон босоо, хэвтээ барилдааны хувилбар, залгаас зэргийг нь нэгд нэгэнгүй судлах болж байх шиг байна.

ХҮРЭЛ МЕДАЛИЙН ТӨЛӨӨХ БАРИЛДААН

            БНСУ-ын бөх Ан Баултай залуу мастер Баянмөнхийн Нармандах дутах юмгүй сайхан барилдлаа. Дэлхийн аварга бөхийг дэнчигнүүлж, давуулж бариад л хоёр тийш нь хавсарч өшиглөөд л мөн ч их сандаргав. Ер нь Б.Нармандах гол ясны бяр сайтай,  унаа холтой юм шиг харагдаж байв. Дэвжээн дээр огт сандарсан шинжгүй л хийе гэснээ хийгээд л барилдах ажээ. Харин дэлхийн аварга олдсон боломжийг ашиглаж, цагийн төгсгөлд үүрээд голлож, дайраад базари үнэлгээ авсан. Энэ мэх нь түүнд ялалт авчирлаа. Харин дараа нь үзвэл “Цаг үе өөр болсон шүү” гэдгийг харуулах юм билээ.

            Дархан-Уул аймгаас тодорсон, өнгөрсөн жилийн улсын аваргад түрүүлсэн Л.Анхзаяа  Балдовын бөх Pelivan Petru-тэй барилдсан. Л.Анхзаяа өрсөлдөгчдөө зай өгөлгүй мэх хийв. Энгэр ханцуйнаас өмсөж, цээжийг нь голлож дайрахаас эхлээд мэхний олон хувибар сонгож байна лээ. Барилдааны төгсгөл хэсэгт зүүн үүрээ  хийж, базари үнэлгээ авсан. Pelivan Petru түүнээс том үнэлгээ авах гэж дайрсан боловч Л.Анхзаяа хамгаалж барилдаад, хүрэл медаль хүртсэн.

            Мөн Хангарьд дэвжээний залуу мастер Б.Цогт-Очир 60 килограммын жинд  хүрэл медаль хүртлээ. Мөн залуу тамирчин Энхтайвны Сумъяабазар, Япон Улсын тамирчин Т.Накамуратай барилдан ялагдал хүлээлээ.

            Тайлбарлагч С.Шижирбатын хэлдгээр цаг үе өөрчлөгдөж, аранзал залуу настай жүдочид төрөн гарч байгаа нь энэ. “Португалийн Гран-при-2022” тэмцээнд оролцсон эдгээр залуу мастерууд тун удахгүй тив дэлхий, олимпын дэвжээн дээр алт, мөнгө, хүрэл медалийн төлөө барилдах цаг ойрхон байгаа. Харин Монголын ард түмэн цэнхэр дэлгэцийнхээ ард сэтгэл зүрхэндээ дээлнийх нь захыг мушгиад, сэтгэл догдлон сууна  гэдэгт огт эргэлзэхгүй байна аа. Шинэ үе, шинэ давлагаа ямагт итгэл найдварын оч авчирсаар ирсэн билээ.