БНСУ-ын жүдоч, 2018 оны дэлхийн аварга, зуны олимпын наадмын хүрэл медальт Ан Чанрим зодог тайлж байгаагаа албан ёсны цахим хуудсаараа дамжуулан мэдээлжээ.

           Тэрбээр энэ талаараа “2021 он миний жүдогийн замнал, Солонгосын шигшээ багийн тамирчин байх сүүлийн жил. Өдийг хүртэл намайг дэмжсээр ирсэн Дэлхийн жүдо бөхийн нийгэмлэг болон Олон улсын жүдо бөхийн холбоонд баярлалаа. Харин одоо би гэр бүл, аз жаргал, эрүүл мэнддээ илүү их анхаарна. Мөн сайн дасгалжуулагч болж, дараа дараагийн олимпын алтан медальтнуудыг бэлтгэхэд анхаарах болно” хэмээжээ.

Өдгөө 27 настай Ан Чанрим жүдо бөхийн дэлхийн аварга шалгаруулах тэмцээнд 2015, 2017 онд хүрэл медаль хүртэж, 2018 оны Бакугийн дэлхийн аваргаас алтан медаль хүртсэн.

           Ан Чанрим анх 2015 онд АНУ-ын Майами хотод болсон залуучуудын дэлхийн аварга шалгаруулах тэмцээнд тэргүүлж, Олон улсын жүдо бөхийн -73 килограммын жингийн чансааг тэргүүлж эхэлсэн билээ. Тэрбээр Абу Даби, Парисын Их дуулга, Чежү, Хөххот, Анталья хотод болсон гранпри тэмцээнд түрүүлж, энэ жил Дохад болсон “Мастер-2021” тэмцээнээс алтан медаль хүртсэн юм.

Эх сурвалж: Judo Inside