Батлан хамгаалах яам, Монголын үндэсний бөхийн холбоо, “Алдар” спорт хороо хамтран “Бүх цэргийн наадам”-ыг өчигдөр буюу арваннэгдүгээр сарын 13-нд зохион байгуулсан.

Энэ удаагийн “Бүх цэргийн наадам”-д цэрэг, хүчний таван спорт хороонд харьяалагддаг аймаг, цэргийн цолтой 256 бөх барилдсанаас Завхан аймгийн Яруу сумын харьяат, “Хилчин” спорт хороо, “Даян” дэвжээний бөх, аймгийн заан М.Лхагвагэрэл найман даван түрүүлж, цэргийн арслан цол хүртсэн байна.

          Мөн Булган аймгийн Орхон сумын харьяат, “Хилчин” спорт хороо, “Булганхан” дэвжээний бөх, аймгийн арслан Э.Сумьяабат үзүүрлэж, идэвхт чимэг нэмжээ. Харин их шөвөгт шалгарсан Төв аймгийн Баянчандмань сумын харьяат, “Сүлд” спорт хороо, “Дүнжингарав” дэвжээний бөх, аймгийн хурц арслан Э.Ууганбаярт цогт чимэг, Хэнтий аймгийн Батширээт сумын харьяат, “Хилчин” спорт хороо, “Хан Хэнтийн аварга” дэвжээний бөх, аймгийн арслан Г.Бадрах хичээнгүй чимэг тус тус олгосон юм.