Японы мэргэжлийн сүмо бөхийн дээд зиндааны 45 удаагийн аварга, Ёкозүна Хакүхо М.Даваажаргал зодог тайлахаар болжээ. Хакүхо М.Даваажаргал баруун өвдөгний бэртлийн улмаас зургаан башё дараалан өнжсөнийхөө өнгөрсөн зун Нагоя башёд оролцож, нэг ч уналгүй 15 удаа давж, дээд амжилт тогтоон 45 дахь Эзэн хааны цомоо хүртсэн. Тэгвэл Их аварга М.Даваажаргалын баруун өвдөгний бэртэл бүрэн эдгэхгүй байгаа нь ийн зодог тайлахад хүргэсэн талаар эх сурвалжууд мэдээлсэн байна.

Хакүхо М.Даваажаргал 1985 оны гуравдугаар сарын 11-нд Монгол Улсын нийслэл Улаанбаатар хотод мэндэлжээ. Түүний аав  Монгол Улсын Гавьяат тамирчин, Монголын үндэсний бөхийн дархан аварга, зуны олимпын наадмын мөнгөн медальт, домогт бөх Ж.Мөнхбат М.Даваажаргалыг бага наснаас нь бөхийн спортоос хөл байлгахыг хичээж, сагсан бөмбөг, хөл бөмбөгийн спортоор хичээллүүлсэн ч бөхөд дуртай М.Даваажаргал 15 насандаа арлын Япон орныг зорьж, 22 насандаа сүмо бөхийн дээд зиндааны Их аварга цолыг хүртсэн билээ.

Ёкозүна Хакүхо М.Даваажаргал сүмо бөхийн карьертаа 1105 удаа ялж, 232 удаа ялагдаж, 125 удаа өнжсөн амжилттай яваа бөгөөд Эзэн хааны цомыг 45 удаа хүртсэнээрээ бусад сүмо бөхийн ертөнцийг хамгийн дээд амжилтыг тогтоож, Гиннесийн номонд бичигдсэн билээ.

Эх сурвалж: Japan Times