“Tокио-2020” зуны олимпoос мөнгөн медаль хүртсэн Монгол Улсын тамирчин Caид Moллай гэр бүлийнхэнтэйгээ уулзахаар ХБНГУ-ыг зориод буй. Тэрбээр Герман Улсад очсон даруйдаа хэвлэлд ярилцлага өгч, Монголын Засгийн газарт гомдож, ивээн тэтгэгч байхгүй байгаад санаа зовж байгаагаа илэрхийлсэн юм.

          Тодруулбал, тэрбээр “Би бүхэл өдрийн турш зочид буудалдаа хүлээж байсан. Хэн ч намайг дуудаагүй. Монгол Улсын өмнөөс барилдаж, медаль хүртсэн ч Монголын үндэсний олимпын хороо, төр засгийн ямар ч хүн надад баяр хүргээгүй. Зарим хүн л хувиараа над дээр ирж, бэлэг гардуулж байсан. Надад шинэ эко машин бэлэглэсэн гэж хэлсэн. Гэсэн хэдий ч тэр автомашин нь 2010 оны автомашин байсан. Харин хүрэл медаль хүртсэн М.Уранцэцэг, Ц.Цогтбаатар хоёрт мөнгөн урамшуулал, байр бэлэглэсэн. Надад мөнгөн урамшуулал, байр бэлэглэсэн гэдэг бол худал мэдээлэл. Намайг байр, мөнгөөр урамшуулаагүй.Миний өнгөрсөн амьдрал хүнд, хэцүү байсан. Надад урамшуулал, туслалцаа хэрэгтэй байсан. Тэгвэл би гэр бүлдээ тусалж чадна” гэсэн юм.

      Мэдэгдэл хийсний дараа түүнийг ХБНГУ-ын иргэншил хүссэн байж болзошгүй хэмээн зарим хэвлэл мэдээллийн хэрэгслээр мэдээлж эхэлсэн билээ. Тэгвэл уг мэдээлэл худал гэдгийг албаны эх сурвалж бататгав.  

           Эх сурвалжийн мэдээлснээр “Caид Moллай нь эхнэр, хүүхэдтэйгээ уулзахаар Герман Улсад очоод байгаагаа албаныханд хэлсэн. Түүнээс Монгол Улсаас урвах, өөр улсын иргэншилтэй болох бодол байхгүй юм билээ. Засгийн газрын шийдвэрийн дагуу олимпод оролцож, медаль хүртсэн тамирчинд олгох урамшуулал, тэтгэмж олох хугацаатай байдаг. Гэтэл түүнд үүнийг Жүдо бөхийн холбооны удирдлагууд сайн ойлгуулж хэлээгүй учраас үл ойлголцол үүссэн байж болзошгүй. Тэрбээр Герман Улсад хэсэгтээ бэлтгэлээ базаахаар төлөвлөөд байгаа” гэв. 

“Токио-2020” олимпын наадмаас медаль хүртсэн тамирчдыг өнгөрсөн долоо хоногт буюу наймдугаар сарын 25-нд Монгол Улсын Ерөнхийлөгч У.Хүрэлсүх, Ерөнхий сайд Л.Оюун-Эрдэнэ нар хүлээн авч уулзах байсан. Харин уг хүндэтгэлийн уулзалт түр хугацаагаар хойшлоод байгаа билээ. Тус уулзалтаар тамирчдад мөнгөн шагнал, байр, цол тэмдэг хүртээх юм.

  Тодруулбал, олимпоос мөнгөн медаль хүртсэн Саид Моллаейд 60 сая төгрөг, гавьяат тамирчин цол, хүрэл медаль хүртсэн гавьяат тамирчин М.Уранцэцэгт 30 сая төгрөг, Хөдөлмөрийн баатар цол, Ц.Цогтбаатар, Б.Болортуяа нарт мөн 30 сая төгрөг, гавьяат тамирчин цол тус тус хүртээнэ.

              Харин Монголын үндэсний олимпын хороо өнгөрсөн пүрэв гарагт олимпоос медаль хүртсэн тамирчдаа хүлээн авч, МҮОХ-ны дээд шагнал “Алтан од” одон гардуулжээ. Мөн олимпоос медаль хүртсэн тамирчдад олгодог энгэрийн тэмдгийг гардуулан өгсөн байна. Шагнал гардуулах үеэр Саид Моллай байгаагүй учир шагналыг нь МҮОХ-ны тэргүүн дэд ерөнхийлөгч, ОУОХ-ны гишүүн Б.Баттүшиг албан ажлаар Герман явахдаа гардуулан өгчээ.