“Токио-2020” паралимпын XVI наадам үргэлжилж байна.

Монгол Улсын тамирчин А.Мөнхбат “Токио-2020” паралимпын наадмын жүдо бөхийн -66 килограмм жингийн төрөлд оролцсон. Тэрбээр эхний шатандаа Австралийн тамирчин Вейн Фиппсийг цэвэр ялсан. Шөвгийн наймд “Лондон-2012” паралимпын алтан медальт, “Рио-2016” паралимпын хүрэл медальт Украины бөх Давид Хоравад ялагдал хүлээлээ. Улмаар дагаж барилдан Японы тамирчин Южирү Сетод ялагдал хүлээж, паралимпаа өндөрлүүлэв.

А.Мөнхбат 66 килограмм жингийн пара жүдо төрлийн дэлхийн чансааны долдугаар байрт эрэмбэлэгддэг. Тэрбээр 2017 онд АНЭУ-ын Абу Даби хотод зохион байгуулсан пара жюү жицүгийн дэлхийн аварга шалгаруулах анхдугаар тэмцээнд тэргүүлж, анхны пара жюү жицүгийн аварга болсон. Харин жүдо бөхийн төрлөөр “Лондон-2012” паралимпад есдүгээр байр эзэлж, 2018 оны Жакартагийн Азийн пара наадмаас хүрэл медаль хүртэж байв.