Япон Улсын нийслэлд болох "Токио-2020" зуны Паралимпын XVI наадамд оролцохоор очсон Монгол Улсын паралимпын үндэсний шигшээ баг Токиогийн Паралимпын тамирчдын тосгонд штабын байраа ажиллуулж эхэлжээ. Монголын багийн штаб "Токио-2020" Паралимпын тосгоны 20 дугаар байрны хоёрдугаар давхрын 202 тоотод байрлаж байгаа юм.

Штабт шигшээ багийн тамирчид цуглаж өдөр тутмын ажил, тэмцээн уралдааны бүх асуудлыг зохион байгуулан чиглүүлж, цаг үеийн байдлыг ярилцан зөвшилцөж, аливаа асуудлыг шийдвэрлэх аж.

"Токио-2020" зуны паралимпын XVI наадмын Монголын баг тамирчдаас хамгийн эхэнд байт харвааны тамирчин Х.Мөнхбаатар наймдугаар сарын 27-ны 09:00-12:00 цагийн хооронд эрэгтэйчүүдийн ST төрлөөр "Yumenoshima Park Archery Field" талбайд урьдчилсан чансаа тогтоох тэмцээнд онч мэргээ сорих юм.

Мөн жүдо бөхийн B3 ангиллын 60 килограмм жинд С.Ядамдорж, B3 ангиллын 66 килограмм жинд А.Мөнхбат нар /10:30-13:30, 16:00-18:40/ "Nippon Budokan" ордны татамид барилдана.

Түүнчлэн тухайн өдрийн 14:00-17:00 цагийн хооронд байт харвааны тамирчин Д.Сэлэнгээ эмэгтэйчүүдийн ST төрөлд урьдчилсан чансаа тогтоох тэмцээнд өрсөлдөнө.