Дэлхийн боксын өсвөр болон залуучуудын аварга шалгаруулах тэмцээнд Монгол Улсаа төлөөлөн хүчээ сорих баг тамирчид өчигдөр буюу наймдугаар сарын 15-нд Арабын нэгдсэн Эмират Улсын нийслэл Дубай хотыг зорьжээ. 

АНЭУ-ын Дубай хотноо 2021 оны наймдугаар сарын 17-31-нд Олон улсын сонирхогчдын боксын холбоо /AIBA/-ноос зохион байгуулах тус тэмцээний өсвөр насны аварга шалгаруулах тэмцээнд 2005-2006 онд төрсөн долоон тамирчин /гурван эмэгтэй, дөрвөн эрэгтэй/ тулалдах бол залуучуудын аварга шалгаруулах тэмцээд 2003-2004 онуудад төрсөн таван тамирчин /хоёр эмэгтэй, гурван эрэгтэй/ хүчээ сорин өрсөлдөх юм. 

Манай баг тамирчдын бүрэлдэхүүнд Монголын өсвөр залуу үеийн шилдэг боксчид багтсан юм байна.

Тухайлбал, Залуучуудын ДАШТ-ий эмэгтэйчүүдийн 57 килограмм хүчээ сорих “Хилчин” спорт хорооны тамирчин Т.Номин-Эрдэнэ өсвөрийн Ази тивийн АШТ-ээс алтан медаль хүртсэн энэ жингийн Монголын шилдэг боксчин билээ.

Баг тамирчдаа дасгалжуулахаар Б.Пүрэв-Очир, Ж.Еркин, Ж.Бат-Отгон, В.Аззаяа нарын дасгалжуулагчид Дубайг зорьжээ.