“Токио-2020” зуны XXXII наадамд Монгол Улсыг төлөөлж, оролцсон баг, тамирчдын хоёр дахь ээлж эх орондоо ирлээ. Япон Улсын нийслэл Токио хотод зохион байгуулсан ээлжит зуны олимпын наадмын чөлөөт бөхийн эмэгтэйчүүдийн -53 килограмм жинд Б.Болортуяа хүрэл медаль хүртсэн. "Токио-2020" зуны олимпын наадмаас хүрэл медаль хүртсэн Б.Болортуяагийн эцэг, эх баярын сэтгэгдлээсээ хуваалцсан юм.

Ээж нь “Охин маань олимпын хүрэл медаль хүртсэнд маш их баяртай байна. Охиныг маань дэмждэг, тусалдаг бүх хүнд баярлалаа гэж хэлмээр байна. Япон руу явахаасаа өмнө охин маань “Бэлтгэлээ сайн хийж байгаа. Аав аа, ээж ээ, би чадна аа” гэж хэлээд явсан. Миний охин чадсан. Зорилгоо биелүүлсэн” гэлээ.

Харин аав нь “Охиноо медаль авна гэдэгт итгэж байсан. Охин минь итгэлийг маань алдсангүй, зорилгоо ч биелүүлж чадлаа. Миний муу охин хөдөлмөрч, хүн чанартай, сайн охин доо” гэсэн юм.