“Токио-2020” зуны XXXII наадамд Монгол Улсыг төлөөлж, оролцсон баг, тамирчдын хоёр дахь ээлж эх орондоо ирлээ. Япон Улсын нийслэл Токио хотод зохион байгуулсан ээлжит зуны олимпын наадмын чөлөөт бөхийн эмэгтэйчүүдийн -68 килограмм жингийн төрөлд дөрөвдүгээр байрт шалгарсан Монгол Улсын гавьяат тамирчин С.Батцэцэг сэтгэгдлээ хуваалцав.

Тэрбээр “Цар тахалтай холбоотойгоор бид үнэхээр хүнд нөхцөл байдалд дунд бэлтгэл хийсэн. Тэр үед асуудлууд ч олон тулгарсан. Олимпын наадамд бүтэн дөрвөн жилийн турш бэлдэж байж оролцдог. Гэсэн хэдий ч хөл хорионд орж, бэлтгэл муу байсан болохоор Токиогийн олимпод оролцох эсэх шийдвэрээ гаргахад ч амаргүй байсан. Бэлтгэл үнэхээр муу байсан.

          Би 2020 оны улсын аварга шалгаруулах тэмцээнд орсноос хойш нэг ч тэмцээнд ороогүй. Мэдрэмж үнэхээр муу байлаа. Харин өнөөдрийн хувьд барилдах, зодог тайлах эсэхээ хэлэхэд үнэхээр хэцүү байна. Хэсэг хугацаанд амарч, гэр бүлийнхэнтэйгээ ярилцаж, шийдвэрээ гаргана” хэмээсэн юм.