32 дахь удаагийн “Токио-2020” зуны олимпын наадмын чөлөөт бөхийн эрэгтэйчүүдийн 125 килограммын жинд Монгол Улсыг төлөөлж, дэлхийн аварга шалгаруулах тэмцээний хүрэл медальт залуучуудын дэлхийн аварга шалгаруулах тэмцээний хүрэл медальт М.Лхагвагэрэл оролцож, шөвгийн дөрөвт мөнгөн медалийн төлөө барилдахаар боллоо. Тэгвэл уншигч та бүхэнд М.Лхагвагэрэлтэй мөнгөн медалийн төлөө барилдах АНУ-ын тамирчин Гэйбл Стивсоны тухай баримтуудыг хүргэж байна.

2021 оны Пан Америкийн аварга, залуучуудын дэлхийн аварга Гэйбл Стивсон наймдугаар ангиасаа чөлөөт бөхөөр хичээллэж эхэлжээ.

Өдгөө 21 настай АНУ-ын шигшээ багийн тамирчин Гэйбл Стивсон 2000 оны тавдугаар сарын 31-нд АНУ-ын Миннесота хотод төрсөн. Түүний ээж 1972 оны Мюнхений олимпын наадмын чөлөөт бөхийн эмэгтэйчүүдийн 68 килограммын жинд алтан медаль хүртсэн Дэн Гэйбл юм. Гэйбл Стивсон бага байхаасаа л ээжийнхээ хуучны барилдаанууд, хоёр ахыгаа чөлөөт бөхөөр хичээллэж байхыг нь харсаар энэ спортод татагдан орсон гэнэ.

Гэйбл Стивсон бизнесийн чиглэлээр Миннесотагийн их сургуульд сурдаг бөгөөд чөлөөт цагаараа холимог тулаан сонирхдог аж. Тэрбээр “Би шилдэг нь байхыг хүсдэг. Харин шилдэг нь болж, хүслээ биелүүлэхийн тулд чадах бүхнээ хийх дуртай” гэж хэлэх дуртай гэнэ.

Түүний амжилтаас:

• 2015 оны өсвөрийн дэлхийн аварга шалгаруулах тэмцээний 100 килограмм жинд алтан медаль
• 2016 оны өсвөрийн дэлхийн аварга шалгаруулах тэмцээний 100 килограмм жинд алтан медаль
• 2017 онд залуучуудын дэлхийн аварга шалгаруулах тэмцээний 120 килограмм жинд алтан медаль
• 2021 оны Пан Америкийн аварга шалгаруулах тэмцээний 125 килограмм жинд алтан медаль