32 дахь удаагийн “Токио-2020” зуны олимпын наадмын чөлөөт бөхийн эмэгтэйчүүдийн -57 килограммын жинд Монгол Улсыг төлөөлж, ОУХМ Б.Хонгорзул оролцож, хүрэл медалийн төлөө барилдахаар боллоо. Тэгвэл уншигч та бүхэнд Б.Хонгорзултай хүрэл медалийн төлөө барилдах АНУ-ын тамирчин Хелен Марулисын тухай баримтуудыг хүргэж байна.

АНУ-ын тамирчин Хелен Марулис чөлөөт бөхийн эмэгтэйчүүдийн -57 килограмм жинд дэлхийд чансаагаараа долоод бичигддэг.

Өдгөө 29 настай Хелен Марулис 1991 оны есдүгээр сарын 19-нд АНУ-ын Нью-Жерси мужид төржээ. Тэрбээр долоон настайгаа анх чөлөөт бөхөөр хичээллэж эхэлсэн бөгөөд энэ талаараа нэгэн ярилцлагадаа “Дүү маань чөлөөт бөхөөр хичээллэж эхэлж байхад нь түүнд хамтрагч хэрэгтэй байсан юм. Тэгээд л би чөлөөт бөхийн спортоор хичээллэж эхэлсэн” гэсэн юм. Хелен Марулис чөлөөт бөхөөр хичээллэж, залуучуудын дэлхийн аварга шалгаруулах тэмцээнээс 2008, 2010 онд хүрэл медаль, 2011 онд мөнгөн медаль хүртэж байжээ.

АНУ-ын тамирчин Хелен Марулис Пан-Америкийн тэмцээнд тэргүүлж, дэлхийн аварга шалгаруулах тэмцээний хошой аварга болж, 2016 оны Риогийн олимпоос алтан медаль  хүртсэн. Тэрбээр олимпын наадмаас алтан медаль хүртсэн Америкийн анхны чөлөөт бөхийн эмэгтэй тамирчин болсон юм. “Рио-2016” олимпын наадмын аваргын төлөөх барилдаанд Хелен Марулис Японы бөх, олимпын гурван удаагийн аварга Саори Ёшидатай таарч, 4:1 харьцаатайгаар ялалт байгуулсан билээ.  Энэ талаараа Хелен Марулис “Домогт аваргыг ялж, аварга болсон минь миний амьдралын хамгийн сайхан мөчүүдийн нэг байлаа. Гэхдээ энэ мөч дахин давтагдахгүй байх гэж бодож байна” хэмээжээ.

Монгол Улсын тамирчин, ОУХМ Б.Хонгорзул, АНУ-ын бөх Хелен Марулис нарын өнөөдөр буюу наймдугаар сарын 5-ны өдрийн 19:55 цагт хүрэл медалийн төлөө барилдах юм.