“Токио-2020” XXXII зуны олимпын наадмын жүдо бөхийн төрөлд Монгол Улсын шигшээ баг оролцож, нэг мөнгө, хоёр хүрэл медалийн эзэн болсон. Тэгвэл эх орныхоо нэрийг олимпод дуудуулсан тамирчид өнгөрсөн шөнө эх орондоо ирсэн юм. Уншигч та бүхэнд олимпын наадмын мөнгөн медальт, дэлхийн аварга, Монгол Улсын тамирчин Саид Моллайн ярилцлагыг хүргэж байна.

-Олимпын наадмаас мөнгөн медаль хүртсэнд баяр хүргэе. Сэтгэгдлээсээ хуваалцахгүй юу?

-Олимпын наадам үнэхээр сайхан болж өнгөрлөө. Маш их баяртай байна. Энэ цугласан хүмүүс бүгдээрээ баяртай байгаа байх гэж бодож байна. Учир нь энэ олимпын мөнгөн медаль Монголынх. Бас миний анхны олимпын медаль болсон. Би олимпоос мөнгөн медаль авсныгаа монголчуудад барьж чадах хамгийн том бэлэг гэж бодож байна.

-Монгол Улсын тамирчин Саид Моллай гэж дуудуулах ямар санагдаж байсан бэ?

-Би одоог хүртэл “Монголын Саид Моллай” гэж дуудсанд маш их баярлаж байна. Өмнө нь би Ираны төлөө барилдаж байсан бол одоо Монгол Улсын төлөө барилдаж байна. Учир нь би одоо Монгол хүн болсон шүү дээ. Би өмнөх амьдралаа мартсан. Надад одоо байгаа нь л чухал. Надад тусалж, дэмжиж байсан бүх хүнд баярлалаа гэж хэлмээр байна. Багш маань, Монголын залуу үеийнхэн намайг дэмжиж байсан нь надад маш их тусалсан.

-Гэр бүлийнхээ тухай ярихгүй юу. Гэр бүлийнхэн чинь Монголд ирэх үү?

-Гэр бүлтэйгээ ярьсан. Гэр бүлийнхнийгээ Монголд ирэх эсэхийг сайн мэдэхгүй л байна. Ирж магад, ирэхгүй ч байж магадгүй. Хэрэв гэр бүлийнхэн маань Монголд ирвэл би үнэхээр аз жаргалтай байх болно.

-Таны дараагийн зорилго, зорилт юу вэ. Юунд хүрэхийг хүсэж, тэмүүлж байна вэ?

-Одоо хэдэн сарын турш амарна. Амарч дуусаад бүхнийг шинээр эхлэх болно. Тэгээд дараагийн олимпод өөрийгөө бэлдэнэ. Одоохондоо надад мөнгөн медаль байсан ч зүгээр. Гэхдээ Монгол Улсын Ерөнхийлөгч асан Х.Баттулга “Заавал алтан медаль аваарай”гэж хэлсэн. Би дараагийн олимпоос алтан медаль авахаа амлаж байна. Алтан медалийн төлөөх дайралтаа сайн бэлдэх болно. Харин одоо бол хэсэг хугацаанд Монголд байрлаж, амарна. Надад олон монгол найз байдаг.

-Та өөрийнхөө Монгол нэрийг мэдэх үү. Таныг олимпоос медаль авч байх үед монголчууд дуу нэгтэйгээр таныг дэмжиж, Монгол нэрээр тань дуудаж байлаа?

-Тийм ээ, би Монгол нэрээ мэднэ. Намайг Молом гэдэг. Үнэхээр сайхан нэр. Намайг Молом нэрээр маань дуудаж байгаа бүх монголчууддаа баярлалаа.

-Монголчуудад хандаж юу гэж хэлэх вэ?

-Та бүхэндээ маш их баярлалаа. Та бүхний сайн, сайхан энерги намайг дэмжиж, энэ амжилтыг гаргахад нөлөөлсөн шүү.