32 дахь удаагийн “Токио-2020” зуны олимпын наадмын чөлөөт бөхийн төрөлд өнөөдөр Монгол Улсыг төлөөлж, хоёр тамирчин дэвжээн дээр гарах юм.

Эмэгтэйчүүдийн -62 килограмм жинд Х.Болортуяа эхний барилдаанаа Энэтхэгийн залуу бөх Сонам Маликтай хийнэ. Урьдчилсан шатны барилдаан 11:00 цагаас эхлэх бөгөөд ОУХМ Х.Болортуяа долоо дахь барилдаанд дэвжээнд гарна. Хэрэв ялалт байгуулбал шөвгийн наймд Бразилын тамирчин Лаис Нунес, дэлхийн аварга, Болгарын бөх Тайбе Юсеин нарын ялсантай нь учраа таарах аж.

Тэгвэл чөлөөт бөхийн эмэгтэйчүүдийн -68 килограмм жинд өчигдөр зодоглож, шөвгийн дөрөвт ялагдал хүлээсэн Монгол Улсын гавьяат тамирчин С.Батцэцэг өнөөдөр дэлхийн аваргын хүрэл медальт Азербайжаны Э.Маналова, Азийн наадмын мөнгөн медальт Киргизстаны бөх М.Жуманазарова нарын ялсантай нь олимпын наадмын хүрэл медалийн төлөө өрсөлдөнө. Медалийн төлөөх барилдаанууд 17:15 цагаас эхлэх бөгөөд С.Батцэцэг 13 дахь барилдаанд дэвжээнд гарах юм.