Хүндийг өргөлтийн дэвжээн дээр +100 килограммын хүнд туйванг өргөж, дэлхийн шилдгүүдээс дутахгүй  өрсөлдөх хэр нь хэн ч харсан даруу төрхтэй түүнийг баргийн хүн дэлхийн аварга шалгаруулах тэмцээнээс хоёр хүрэл медаль хүртсэн шилдэг туйванч гэдгийг нь мэдэхгүй. Тэр бол “Алтан охин” хэмээн хүндийг өргөлтийн спортдоо алдаршсан Монгол Улсын гавьяат тамирчин М.Анхцэцэг. Токиогийн олимпын -87 килограмм жинд өрсөлдөж, шагналт дөрөвдүгээр байрт орсон ч “Дараагийн олимпоос заавал алтан медаль авч, монголчуудаа баярлуулна” хэмээн зогсох М.Анхцэцэг ялагдсан ч, монголчуудын сэтгэлд ялалт байгуулсан юм. 

-Монголын шилдэг туйванч болох эхлэл-

М.Анхцэцэгийг бага байхад нь хамаатных нь ах нар хүндийг өргөлтөөр хичээллэдэг байсан нь түүнийг энэ спорт руу оруулах хамгийн ихээр нөлөөлсөн гэдэг. Ах нарынхаа бэлтгэл хийхийг өдөр бүр, цээжинд хоногштолоо харсан М.Анхцэцэг туйванч болохоор шийдэж, бэлтгэл хийж эхэлсэн юм. Тэрбээр есөн настайдаа Монгол Улсын Ерөнхийлөгчийн нэрэмжит тэмцээнд оролцож, хүрэл медаль хүртэж, анхны амжилтаа гаргаж байв.

Улмаар 114 дүгээр сургуульд бэлтгэлээ хийж эхлэн 12 настай спортын мастер, 13 насандаа олон улсын хэмжээний мастер цолны болзол хангаж байсан юм. Хүндийг өргөлтийн спортод бэлтгэл, хүч, тэнхээ чухал байдаг бол “туйванч болохоор төрсөн” М.Анхцэцэг бусдаас онцгойрч, гялалзаж байлаа.

-Хүндийг өргөлтийн АНХНЫ гэх тодотголтой бүх амжилт М.Анхцэцэгийнх-

2016 онд М.Анхцэцэг санхүүгийн хүндрэлийн улмаас дасгалжуулагч үгүй, ганцаараа Мексикт зохион байгуулсан оюутны дэлхийн аварга шалгаруулах тэмцээнийг зорьсон. Харь нутагт, хайртай дотнын хүмүүс, баг, хамт олонгүй ганцаараа явсан ч оюутны дэлхийн аварга шалгаруулах тэмцээнд Монгол Улсынхаа төрийн далбааг мандуулж, аварга болсон юм.

М.Анхцэцэгийн амжилт цааш үргэлжилсээр 2017 онд хүндийг өргөлтийн спортын дэлхийн аваргаас хүрэл медаль хүртэж байв. Тэрбээр дэлхийн хүндийг өргөлтийн спортод эх орныхоо нэрийг тамгалж, Монгол Улсын туйванчдын түүхэн дэх анхны дэлхийн медальтан болсон. Харин М.Анхцэцэгийн амжилт буухиа зогсоогүй. Цааш үргэлжилсээр 2019 онд Тайланд Улсад зохион байгуулсан дэлхийн аварга шалгаруулах тэмцээнээс мөн хүрэл медаль хүртэж, дэлхийн аваргын хошой медальтан болсон билээ. Үүгээр ч тогтохгүй дэлхийн цомд түрүүлж, дэлхийн цомыг хүртсэн анхны монгол хүн болсон. Анхны гэх тодотголтой түүхийг ар араас нь бүтээсээр буй М.Анхцэцэг Монгол Улсынхаа хүндийг өргөлтийн спортын 70 гаруй рекордыг шинэчлэн тогтоосон байдаг.

-“Би мөнгөний төлөө туйван өргөдөггүй. Эх орныхоо төлөө өргөдөг”-

Хүндийг өргөлтийн спортод шижир алт мэт гялалзаж байсан М.Анхцэцэгт одоогоос таван жилийн өмнө Казахстан, АНУ, БНСУ, Узбекистан Улсаас эх орных нь төлөө тоглох санал ирсэн юм. БНСУ М.Анхцэцэгт санал тавихдаа “Чи ядуу Монгол Улсын тамирчин байхын оронд манай улсын тамирчин бол. Гэрээний төлбөрт 500 мянган вон өгч, сар бүр 12 мянган ам.долларын цалин өгье” гэсэн аж. Харин Монгол Улсын гавьяат тамирчин М.Анхцэцэг хариуд нь “Би мөнгөний төлөө туйван өргөдөггүй. Эх орныхоо төлөө өргөдөг. Миний эх орон ядуу биш. Энэ бол цаг зуурын зүйл. Эх орноо баян болгох нь бидний чин үүрэг. Би эх орныхоо төлөө тэнгэр өөд өргөдөг учраас л миний дотроос энэ их хүч гарч байгаа. Хэрэв мөнгөний төлөө өргөвөл би хэн ч биш болно” гэсэн гэдэг.

Туйван өргөхдөө л эх орноо хайрлаж, хүндэлдэг “Алтан охин” М.Анхцэцэг энэ удаад ч үзэгчдийнхээ итгэлийг алдаагүй юм. 18-хан насандаа 2016 оны Риогийн олимпын наймд эрэмбэлэгдсэн “Алтан охин” Токиогийн олимпоор амжилтаа ахиулж, дөрөвт орлоо. Олимпын наадмаа өндөрлүүлснийхээ дараа “Дараагийн олимпоос заавал алтан медаль авч, монголчуудаа баярлуулна” хэмээсэн юм.

М.Анхцэцэг 2017 оны арванхоёрдугаар сарын 3-нд дэлхийн аварга шалгаруулах тэмцээнээс медаль хүртсэн анхны гуйванч болсон. Тэр цагаас хойш түүний түүх бүтээсэн арванхоёрдугаар сарны 3-ны өдрийг Монголын хүндийг өргөлтийн холбооноос “Монголын хүндийн өргөгчдийн баярын өдөр” болгон тэмдэглэж байх шийдвэр гаргасан юм. М.Анхцэцэг өдгөө дөнгөж 23 настай ч Монголын хүндийг өргөлтийг дэлхийд таниулж чадсан амьд домог билээ.