“Токио-2020” зуны олимпын наадмын боксын эрэгтэйчүүдийн -57 килограммын жингийн шөвгийн наймын тулаанд Монголын тамирчин Э.Цэндбаатар ОХУ-ын олимпын хорооны боксчин Алберт Батыргазиевтай учраа таарсан. Тулааны эхний хоёр үед Э.Цэндбаатар, сүүлийн үед Алберт Батыргазиев илүүрхэж, нийлбэр дүн тэнцсэн ч ОХУ-ын олимпын хорооны тамирчин ялалт авсан. Тиймээс Монголын үндэсний олимпын хороо гомдол гаргаад байгаа билээ.

      Энэ талаар Монголын боксын холбооны Ерөнхий нарийн бичгийн дарга, Олимпын зэрэглэлийн шүүгч Г.Бадрах “Гуравдугаар үе дээр Кубийн шүүгч найман оноо өгч, тоглолтыг эргүүллээ. Би өөрөө олимпын зэрэглэлийн шүүгч. Шүүгчийн хувьд дүгнэхэд, ийм зүйл байж болохгүй. Миний хувьд дараагийн даваанд Кубийн тамирчинтай тоглох учраас тамирчныхаа замыг засах гэж найман оноо өгч, тоглолтыг эргүүлсэн гэж харж байна. Хоёрдугаарт, ОХУ-ын олимпын хорооны тамирчин тоглож байхад ЗХУ-ын бүрэлдэхүүнд байсан улсуудын шүүгч нарыг тавьсан нь сонин байна. Орос хэлтэй Казахстан, Литва улсын шүүгч нарыг энэ тоглолтод тавих нь ашиг сонирхлын зөрчил үүсгэж байна. Мөн гуравдугаар раундын төгсгөлд манай тамирчныг тоолсон. Тоолохоор цохилт байгаагүй. Маш харамсалтай байна. МҮОХ-ны Ерөнхий нарийн бичгийн дарга Э.Бадар-Ууган, МҮОХ-ны тэргүүн дэд ерөнхийлөгч С.Баттүшиг нартай сая утсаар холбогдлоо. Олимпын зохион байгуулах хорооныхонтой уулзаж байна гэж байна.

Олон улсын боксын холбооны дүрмээр 3:2 гэсэн харьцаатайгаар ялалт байгуулсан тохиолдолд ялалтыг хүлээж, эргүүлэх тохиолдол байдаг. Хэрвээ 4:1, 5:0-оор төгссөн бол ялалтыг эргүүлэх боломж байхгүй.

      Манай үзэгчид ч гэсэн харсан байх. Э.Цэндбаатар жин их хассан, бага зэрэг ядарсан байдал ажиглагдсан. Гэхдээ оноог нь тоолоод харахад Э.Цэндбаатар үнэхээр илүү тоглолтыг үзүүлж чадсан шүү дээ. Найман оноог илт муу тоглож байгаа тамирчинд өгдөг. Энгийн үгээр хэлвэл бокс огт мэдэхгүй хүн ч хараад ялж байгаа тамирчныг нь мэдэхээр тоглолтод өгдөг” гэлээ.