32 дахь удаагийн “Токио-2020” зуны олимпын наадам ес дэх өдрөө үргэлжилж байна.

   Боксын эрэгтэйчүүдийн -57 килограммын жинд гавъяат тамирчин Э.Цэндбаатар ОХУ-ын олимпын хорооны тамирчин Алберт Батыргазиевтай шийдвэрлэх тулаанаа хийлээ. Уг тулаанд Э.Цэндбаатар эхний хоёр үед  тэргүүлж байсан боловч, эцсийн мөчид шүүгчдийн саналаар 3:2 харьцаатай Алберт Батыргазиевт ялагдлаа. Тодруулбал, тулааны төгсгөлд таван шүүгчийн саналаар хоёр тамирчны дээд оноо 2:2 харьцаатай тэнцэж байсан ч сүүлийн үед Кубын шүүгч Э.Цэндбаатарт найман оноо өгжээ. Ингэснээр Кубын шүүгчийн хоёр тамирчинд өгсөн нийт оноо тус бүр 28 болсон ч Монголын тамирчин ялагдал хүлээсэн юм.  Ийнхүү ОХУОХ-ны боксчин наймдугаар сарын 3-нд Кубын тамирчинтай хүрэл медалийн төлөө тулалдахаар болов.

Э.Цэндбаатар улаан талаас гарч тулалдсан.

   Тэрбээр эхний тулааны долдугаар сарын 24-нд Кенийн боксчин Окот Николас Оконготой хийж, шүүгчдийн саналаар 3:2 харьцаатай ялалт байгуулсан юм. Харин хоёр дахь тулаанаа долдугаар сарын 28-нд Вьетнамын боксчин Нгуен ван Донгтой хийж, шүүгчдийн саналаар 5:0 харьцаатай илт давуу ялсан билээ.

Э.Цэндбаатар өдгөө 24 настай бөгөөд “Рио-2016” олимпын наадамд тавдугаар байрт шалгарч байсан юм. Мөн тэрбээр 2018 оны Азийн наадмын аварга, 2019, 2021 оны ААШТ-ий аварга, 2019 оны Екатеринбургийн ДАШТ-ий хүрэл медальт, хөнгөн жингийн шилдэг боксчин юм.