“Токио-2020” зуны олимпын наадамд Монгол Улсыг төлөөлж, оролцсон шигшээ багийн хамгийн залуу тамирчин Б.Болор-Эрдэнэ шигшээ багийнхаа Токиогийн олимп дахь хамгийн анхны ялалтыг авч, ирсэн. Харин олимпын ширээний теннисний хоёр дахь тоглолтоо Чили Улсын тамирчин Паулиниа Вегагийн эсрэг хийж, ялагдал хүлээж, олимпын наадмаа өндөрлүүлсэн юм. Шигшээ багийн хамгийн залуу тамирчин Б.Болор-Эрдэнэ олимпын наадамд оролцсон сэтгэгдлээ хуваалцлаа.

Тэрбээр “Олимпын наадамд энэ төрлөөр өрсөлдсөн хамгийн анхны тамирчдын нэг болсондоо баяртай байна. Энэ бол ширээний теннисний спортын 61 жилийн түүхэнд анх удаа болж буй чухал үйл явдал байлаа. Миний хувьд Токиогийн олимпод оролцсондоо сэтгэгдэл маш өндөр байна. Олимпын наадам бол дэлхийн хамгийн том тэмцээнүүдийн нэг.

          Дэлхийн шилдэг тамирчидтай нэг зааланд, нэг ширээний ард тоглох үнэхээр сайхан байсан. Миний цаашдын зорилго бол Монгол Улсынхаа ширээний теннисний спортоор дэлхийд эрэмбэлэгддэг ранкийг дээшлүүлж, дэлхийн шилдгүүдтэй өрсөлддөг болоход хувь нэмрээ оруулах явдал юм.

          Намайг энэ хүртэл явахад тусалж дэмжсэн гэр бүл, найз нөхөд болон Биеийн тамир, улсын хороо, Олимпын хорооныхондоо маш их баярлаж байна. Цаашдаа улам хичээж, илүү их амжилт гаргах болно” гэв.