32 дахь удаагийн “Токио-2020” зуны олимпын наадмын сонирхогчдын боксын эмэгтэйчүүдийн төрөлд Монгол Улсын төлөөлөл анх удаа оролцсон. Уг төрлийн -75 килограмм жинд ОУХМ М.Мягмаржаргал өрсөлдөж, Их Британийн боксчин Лорен Прайстай таарч, ялагдал хүлээсэн юм.

Тэрбээр тулааныхаа дараа “Монголын эмэгтэй боксын төлөөлөл болоод олимпийн их наадамд оролцсондоо баяртай байна. Эхний ялалтаа авъя гэж бодсон ч чадсангүй. Намайг бэлдсэн багш, дэмжсэн гэр бүл, хүмүүсийнхээ итгэлийг алдаад хожигдчихлоо. Гэхдээ дэлхийн аварга байгаа. Гурван жилийн дараа дахиад олимп байна. Даагаа нэхэж, сайн оролцож Монголынхоо далбааг заавал мандуулна. Олимпод оролцож буй тамирчин бүр л сайн. Өрсөлдөгч тамирчнаа багштайгаа нийлж судалж тоглосон. Багшийнхаа хэлсэн ярьсныг биелүүлж чадсангүй. Мундаг тамирчин байлаа. Монголын эмэгтэй бокс хөгжөөд маш сайн тамирчид доороос гарч ирж байна. 2024 оны олимп ойрхон байна. Эмэгтэй таван жингээрээ дараагийн олимпод ормоор байна. Ээждээ хайртай шүү. Намайг өдий зэрэгт хүртэл дэмжээд туслаад олимпийн рингэн дээр гаргасанд баярлалаа. Би заавал төрийнхөө далбааг мандуулна. Хүмүүсийн итгэлийг алдсан уучлаарай” гэв.