32 дахь удаагийн “Токио-2020” зуны олимпын наадам үргэлжилж байна. Тус наадмын дөрөв дэх өдрийн тэмцээнүүд өндөрлөж, АНУ-ын шигшээ баг 25 медальтайгаар тэргүүлж байгаа бол түүний араас БНХАУ-ын шигшээ баг 21 медальтайгаар удаалж байгаа юм. Харин зуны олимпын наадмыг зохион байгуулагч Япон Улс нийт 18 медаль хүртсэнээс 10 алтан медаль цуглуулжээ. Тэгвэл уншигч та бүхэнд ээлжит зуны олимпын дөрөв дэх өдрийн тэмцээнүүдэд оролцсон Монгол Улсын шигшээ багийн тамирчдын тоглолтыг тоймлон хүргэж байна.

-“Токио-2020” зуны олимпын буудлагын 10 метрийн холимог багийн төрлийн урьдчилсан шатанд Монгол Улсыг төлөөлж, Ц.Анударь, Э.Даваахүү нар цэц сорьсон. Тус төрөлд нийт 20 улсын баг тамирчид оролцсоноос манай баг тамирчид 571 оноогоор 13 дугаар байрт орж, тэмцээнээ дуусгав. Хоёр тамирчин тус бүр 30 сум тавьж, Ц.Анударь 278, Э.Даваахүү 293 оноо авчээ. Харин эхний шатанд тэргүүлсэн Энэтхэгийн баг тамирчид 582 оноо авсан байна.

-Жүдо бөхийн эмэгтэйчүүдийн -63 килограммын жинд барилдаж буй Б.Ганхайч эхний барилдаандаа Мексикийн бөх Авити Алкараз Прискаг цэвэр ялж, шөвгийн 16-д шалгарсан. Улмаар Б.Ганхайч хоёр дахь барилдаанаа Бразилын бөх Кетлейн Квадросын эсрэг хийж, ялагдал хүлээсэн.

-Монголын сагсан бөмбөгийн 3х3 төрлийн эмэгтэйчүүдийн шигшээ баг тойргийн сүүлчийн тоглолтоо БНХАУ-ын шигшээ багийн эсрэг хийж, 21:9 онооны харьцаатайгаар хожигдсон. Улмаар сагсан бөмбөгийн 3х3 эмэгтэй баг олимпын наадмаа өндөрлүүлсэн юм.

-Харин жүдо бөхийн -81 килограмм жинд Монгол Улсын тамирчин, дэлхийн аварга Саид Моллай барилдаж, олимпын наадмын мөнгөн медаль хүртсэн. Тодруулбал, Саид Моллай жүдо бөхийн эрэгтэйчүүдийн -81 килограмм жингийн эхний барилдаандаа Казахстан Улсын тамирчин Хамза Дидартай таарч, цэвэр ялалт байгуулсан. Харин дараагийн барилдаандаа Азербайжаны жүдоч Мурад Фатиевтэй барилдаж, нэмэлт цагт вазари үнэлгээгээр ялсан билээ. Улмаар шөвгийн наймд Гүрж Улсын тамирчин Григалашвили Татог цэвэр ялсан. Шөвгийн дөрөвт Австри Улсын жүдоч Борчашвили Шамилтай барилдаж, мөн цэвэр ялалт байгуулаад байсан юм. Харин “Токио-2020” олимпын наадмын алтан медалийн төлөө Япон Улсын жүдоч Таканори Нагасэтэй алтан медалийн төлөө барилдаж, нэмэлт цагт ялагдал хүлээж, олимпын наадмын мөнгөн медаль хүртсэн билээ.