32 дахь удаагийн “Токио-2020” зуны олимпын наадмын жүдо бөхийн -81 килограмм жинд Монгол Улсын тамирчин, дэлхийн аварга Саид Моллай барилдаж, мөнгөн медалийн болзол хангаад байна. Хэсэг хугацааны дараа тэрбээр Япон Улсын жүдоч Таканори Нагасэтэй алтан медалийн төлөө барилдах юм.

Жүдо бөхийн дэлхийн аварга Таканори Нагасэ нь Олон улсын жүдо бөхийн холбооноос зохион байгуулдаг тэмцээнүүдээс нийт 4250 оноо цуглуулж, дэлхийн -81 килограмм жингийн 13-т эрэмбэлэгддэг. Харин Монгол Улсын тамирчин, дэлхийн аварга Саид Моллай жиндээ дэлхийд зургаад жагсдаг билээ. Хоёр тамирчны хувьд өмнө нь таарч барилдаж байгаагүй юм.

Монгол Улсын тамирчин, дэлхийн аварга Саид Моллай жүдо бөхийн эрэгтэйчүүдийн -81 килограмм жингийн эхний барилдаандаа Казахстан Улсын тамирчин Хамза Дидартай таарч, цэвэр ялалт байгуулсан. Харин дараагийн барилдаандаа Азербайжаны жүдоч Мурад Фатиевтэй барилдаж, нэмэлт цагт вазари үнэлгээгээр ялсан билээ. Улмаар шөвгийн наймд Гүрж Улсын тамирчин Григалашвили Татог цэвэр ялсан. Шөвгийн дөрөвт Австри Улсын жүдоч Борчашвили Шамилтай барилдаж, мөн цэвэр ялалт байгуулаад байсан билээ.