32 дахь удаагийн “Токио-2020” зуны олимпын наадмын жүдо бөхийн -81 килограмм жинд Монгол Улсын тамирчин, дэлхийн аварга Саид Моллай барилдаж, шөвгийн дөрөвт шалгарсан. Тэгвэл олимпын наадмын шөвгийн дөрөвт Саид Моллайтай барилдах Австри Улсын тамирчин Борчашвили Шамилын тухай баримтуудыг уншигч та бүхэнд хүргэж байна.

Австри Улсын жүдоч Борчашвили Шамил нь Олон улсын жүдо бөхийн холбооны тэмцээнүүдэд нийт 2792 оноо цуглуулж, -81 килограммын жинд дэлхийд 22 дугаар байрт жагсдаг.

Энэ жил Унгар Улсын нийслэл Будапешт хотод зохион байгуулсан жүдо бөхийн 2021 оны дэлхийн аварга шалгаруулах тэмцээнд эрэгтэйчүүдийн -81 килограмм жинд шөвгийн дөрөвт шалгарч, дэлхийн аварга Саид Моллайтай шөвгийн дөрөвт барилдаж, ялагдал хүлээж байжээ.

Өдгөө 26 настай Борчашвили Шамил энэ жил “Тбилис-2021” их дуулгаас мөнгөн медаль, 2019 онд Ташкентын гран пригээс хүрэл медаль хүртэж байсан юм.