32 дахь удаагийн “Токио-2020” зуны олимпын наадам үргэлжилж байна. Тус наадмын гурав дахь өдрийн тэмцээнүүд өндөрлөж, БНХАУ-ын шигшээ баг 18 медальтайгаар тэргүүлж байгаа бол түүний араас АНУ-ын шигшээ баг 15 медальтайгаар удаалж байгаа юм. Харин зуны олимпын наадмыг зохион байгуулагч Япон Улс нийт 13 медаль цуглуулжээ. Тэгвэл уншигч та бүхэнд ээлжит зуны олимпын гурав дахь өдрийн тэмцээнүүдэд оролцсон Монгол Улсын шигшээ багийн тамирчдын тоглолтыг тоймлон хүргэж байна.

-Олимпын наадмын гурав дахь өдрийн тэмцээнд Монголын сагсан бөмбөгийн 3х3 төрлийн эмэгтэй шигшээ баг тав дахь тоглолтоо Румын Улсын шигшээ багийн эсрэг хийж, 22:14 онооны харьцаатайгаар ялагдал хүлээв. Улмаар зургаа дахь тоглолтоо Франц Улсын шигшээ багтай хийж, 22:18 онооны харьцаатайгаар хожигдсон юм.

-Жүдо бөхийн эмэгтэйчүүдийн -57 килограмм жинд олимпын наадмын мөнгөн медальт, дэлхийн аварга Д.Сумъя оролцсон. Тэрбээр шигшээ 32-ын барилдаанд Словенийн жүдоч Кажа Кайзертай барилдаж, ялагдал хүлээсэн юм.

- ОУХМ Ц.Цогтбаатар -73 килограмм жингийн эхний барилдаанаа Гвинейн тамирчин Мамадоу Самбатай хийж, цэвэр ялалт байгуулсан. Улмаар шөвгийн 16-д Монакогийн жүдоч Сидрик Бесситэй барилдаж, мөн л цэвэр ялсан юм. Хэсгийн аваргын төлөө Косовогийн Гжаковат таарч, вазари үнэлгээгээр өрсөлдөгчөө буулгасан билээ. Харин шөвгийн дөрөвт Японы жүдоч Оно Шохейд ялагдаад байсан юм. Улмаар хүрэл медалийн төлөө Канад Улсын жүдоч Артур Маргелидонтой таарч, өчих мэхээр цэвэр ялалт байгуулж, Монгол Улсын шигшээ багийн Токиогийн олимпоос авч буй хоёр дахь медалийг хүртсэн билээ.