32 дахь удаагийн “Токио-2020” зуны олимпын наадам үргэлжилж байгаа. Өдгөө 20 настай Япон Улсын серфингийн спортын тамирчин Цүзүки Амүрогийн олимпын сэтгүүлд өчигдөр буюу долдугаар сарын 26-нд өгсөн ярилцлагыг хөрвүүлэн хүргэж байна.

Тэрбээр “WSL TOUR” тэмцээнд аваргалсан анхны Япон Улсын эмэгтэй тамирчин болж байв. Харин ээлжит зуны олимпын төрөлд шинээр багтсан серфингийн тэмцээний эхний гурван тойрогтоо ялагдалгүй яваа тэрбээр өнөөдөр буюу долдугаар сарын 27-нд ээлжит тоглолтоо хийх юм.

-УСТАЙ ОЙРХОН БҮХЭНД ХАЙРТАЙ-

-Анх хэзээнээс энэ төрлийн спортоор хичээллэж эхэлсэн юм бэ?

       -Би Сайтама мужид төрсөн ч гурван настайдаа Фүжисава руу нүүсэн юм. Багаасаа л спортод сонирхолгүй, юмнаас хол байсан. Бага сургуулийн дөрөвдүгээр ангидаа балетаар хичээллэдэг байлаа. Харин түүний дараа жил серфингээр хичээллэж, эхлээд л шууд дурлачихсан.

-Тэгэхээр 10 орчим настайгаасаа серфингээр хичээллэж эхэлсэн гэсэн үг үү?

       -Тийм ээ, би яг 10 настайдаа энэ спортоор хичээллэж эхэлсэн. Сонгодог балетаар хичээллэдэг байхдаа түүнээс өөр илүү шаргуу ажиллаж, тэвчээр шаарддаг зүйл хийж үзмээр санагдсан юм. Тухайн үед аав, ах хоёр маань ч серфингээр хичээллэдэг байв. Магадгүй энэ төрлийн спорт руу орсон минь тэр хоёроос их нөлөөтэй байх. Цаг үргэлж харж суусаар байгалийн жамаараа л энэ төрөлд орсон.

-Серфингийн төрөл бусад спортоосоо юугаараа ялгаатай юм бэ?

       -Серфинг бусад спортын төрлөөсөө илүү байгальтай харьцаж чаддаг. Далайн давлагаанд ижил долгион байдаггүй. Давлагаа бүр өөр өөр байдаг. Энэ мэт илүү байгальтай ойр зүйл нь бусад спортоосоо илүү ялгаатай болгодог.

-Бага наснаасаа л далай, байгальд ийм их хайртай байсан уу?

       -Тийм ээ. Би бага байхдаа л усан дотор тоглох, эрэг дээр тоглох дуртай байсан. Устай ойрхон бүхэнд хайртай байлаа.

-“Токио-2020” олимпын наадмын серфингийн тэмцээн Ичиномия дахь Цүригасаки далайн эрэгт болж байгаа. Та тэр байгаль, далайн талаар хэр ихийг мэдэх вэ?

       -Бага ангийн сурагч байхаасаа л мэднэ. Магадгүй Цүригасаки далайн орчимд дөрвөн жил гаруй хугацаанд бэлтгэл хийсэн байх. Бүх зүйлийг нь мэдэрч, ойлгодог ч юм шиг. Цүригасаки далай бол миний бага насны сургууль, багш л гэсэн үг.

-Тэгвэл өөр хэнээс ч илүү мэддэг газартаа олимпын наадамд оролцож байгаа нь таны хамгийн том давуу тал гэж ойлгож болох уу?

       -Мэдээж хэрэг. Зуны олимпын наадам эхлэхээс өмнө хэсэг хугацаанд оюун ухаанаа төвлөрүүлж, анхаарлаа хандуулахад чиглэсэн. Зөвхөн серфингийн дасгал бус оюун санаагаа ч бэлдэж чадвал эх орондоо олимпын медаль авч, ирж чадна гэж бодсон. Би өөрийн серфингийн чадвартаа санаа зовохгүй байна. Харин оюун ухаанаа төвлөрүүлэх, сэтгэл зүйгээ хянахын тулд чадах бүхнээ хийх болно.

-Сэтгэл зүйгээ хамгаалах, амар амгалан  мэдрэх, хамгийн сайхан мэдрэмжүүдээ хадгалахын тулд юу хийдэг вэ?

       -Маш олон төрлийн зүйл хийхийг хичээдэг. Одоо би хамгийн анхны олимпын наадамдаа оролцож байна. Олимпын эхний тэмцээний агуу тайзан дээр гарахдаа л сандарч эхэлсэн. Гэхдээ гайгүй өнгөрсөн. Өмнө нь маш олон удаа тоолж барамгүй үзэгч байна гэж төсөөлөөд бэлтгэлээ хийж байсан юм.

-Үзэгч, спорт сонирхогчдын мэддэггүй Цүзүки Амүро амьдралынхаа нэг өдрийг хэрхэн өнгөрөөдөг вэ?

       -Өдөр бүр өглөөний 06:00 цагт босдог. 07:00 цаг гэхэд далайн орчимд гараад хоёр цаг гаруйн хугацаанд бэлтгэлээ хийдэг юм. Тэгээд үд дунд цайгаа уугаад үдээс хойш үргэлжлүүлээд 3-4 цаг бэлтгэлээ хийдэг л дээ. Бэлтгэлээ дууссаныхаа дараа оройн хоолны өмнө байгаль дунд гүйдэг. Тэгээд л орой болчихдог. Энэ л миний амьдралын нэг өдөр юм даа.

-Зөвхөн серфингийн дасгал бус бусад биеийн тамирын бэлтгэл хийдэг үү?

       -Би автомат машин дээр нэг их бэлтгэл хийгээд байдаггүй л дээ. Гэхдээ дасгалжуулагчтайгаа ярилцаад гурав өдөрт нэг удаа серфингтэй холбоотой байж болохуйц бусад бэлтгэл хийдэг.

-Олимпын наадамтай холбоотой хамгийн сайхан дурсамжаасаа хуваалцаач?

       -“Афин-2004”, “Бээжин-2008” олимпын наадмын 100 метр/ 200 метрт түрүүлж, түүхэн амжилт тогтоосон Китажима Косүкэ энэ их амжилтынхаа дараа “Одоо л бүх зүйл сайхан санагдаж байна” гэж хэлж байлаа. Бага ангийн сурагч байхдаа телевизээр сонсож байсан энэ үгс надад маш их урам зориг өгсөн юм. Бас олимпын наадмын тайз,  дэвжээн дээр хэлсэн үгсийг хамгийн хүчтэй үг гэж боддог. Китажима Косүкэгийн хэлсэн тэр үгс одоо ч гэсэн маш олон тамирчдын зориг болж явдаг байх аа.

-Олимпоос наадмын тайзан дээрээс Китажима Косүкэгийн хэлсэн үгнээс их урам авсан юм байна. Тэгвэл танд хамгийн их урам зориг өгдөг зүйл юу вэ?

       -Намайг дэмждэг, дэмжиж байгаа хүмүүсийг онцолмоор байна. Бусад тамирчин, дэмждэг хүмүүстэйгээ уулзах мөч надад маш их урам хайрладаг.