32 дахь удаагийн “Токио-2020” зуны олимпын наадам гурав дахь өдрөө үргэлжилж байна.

Жүдо бөхийн -73 килограмм жингийн хэсгийн аваргын төлөөх барилдаанд ОУХМ Ц.Цогтбаатар Косовогийн тамирчин Гжаковаг вазари үнэлгээгээр ялж, шөвгийн дөрөвт шалгарсан. Тэгвэл уншигч та бүхэнд ээлжит зуны олимпын наадмын жүдо бөхийн -73 килограмм жинд ОУХМ Ц.Цогтбаатартай барилдах Япон Улсын тамирчин Оно Шохейн тухай баримтуудыг хүргэж байна.

“Рио-2016” зуны олимпын наадмын алтан медальт, Дэлхийн аварга Оно Шохей нь 1992 оны хоёрдугаар сарын 3-нд Япон Улсын Ямагүчи хотод төрсөн. Тэрбээр долоон настайгаасаа Ямагүчи хотод жүдо бөхийн спортоор хичээллэж, бага ангиа дүүргэснийхээ дараа нийслэл Токио хот руу нүүж, жүдо бөхийн замналаа эхлүүлсэн юм.

Оно Шохей нь Олон улсын олимпын хорооноос зохион байгуулдаг их дуулга тэмцээнээс таван удаа алтан медаль авч, нэг мөнгө, нэг хүрэл хүртсэн. Мөн 2013, 2014, 2015, 2019 оны Дэлхийн аварга шалгаруулах тэмцээнээс алт, 2013 оны Дэлхийн аварга шалгаруулах тэмцээнээс хүрэл медаль хүртэж, “Рио-2016” зуны олимпын наадмаас алтан медаль хүртсэн билээ.

Оно Шохей нь жүдө бөхийн замналдаа нийт 67 барилдаанд оролцож, 53-т нь хожил байгуулснаас 39-т нь цэвэр ялалт байгуулсан юм.