32 дахь удаагийн “Токио-2020” зуны олимпын наадам үргэлжилж байна. Тус наадмын хоёр дахь өдрийн тэмцээнүүд өндөрлөж, БНХАУ-ын шигшээ баг 11 медальтайгаар тэргүүлж байгаа бол түүний араас АНУ-ын шигшээ баг 10 медальтайгаар удаалж байгаа юм. Тэгвэл уншигч та бүхэнд ээлжит зуны олимпын хоёр дахь өдрийн тэмцээнүүдэд оролцсон Монгол Улсын шигшээ багийн тамирчдын тоглолтыг тоймлон хүргэж байна.

-Ээлжит зуны олимпын наадмын хоёр дахь өдрийн тэмцээнүүд эмэгтэйчүүдийн буудлагын 10 метрийн гар бууны төрлөөр эхэлсэн. Тэгвэл уг төрөлд Монгол Улсаа төлөөлж, оролцосн ОУХМ Ц.Анударь 576 оноо авч, есдүгээр байрт шалгарсан.

-Мөн тус төрөлд Монгол Улсын Хөдөлмөрийн баатар О.Гүндэгмаа оролцож, 568 оноотойгоор 30 дугаар байрт оров.

-Монголын сагсан бөмбөгийн 3х3 төрлийн эмэгтэйчүүдийн шигшээ баг зуны олимпын наадмын хоёр дахь өдрийн эхний тоглолтоо ээлжит олимпыг зохион байгуулж байгаа Япон Улсын шигшээ багийн эсрэг хийж, 19:10 онооны харьцаатай ялагдал хүлээсэн. Улмаар шигшээ баг дараагийн тоглолтоо ОХУ-ын шигшээ багтай хийж, 21:5 онооны харьцаатайгаар хожигдсон юм.

-Жүдо бөхийн эмэгтэйчүүдийн -52 килограмм жинд оролцсон ОУХМ Л.Сосорбарам эхний шатандаа Узбекистаны тамирчин Келдиорова Диёратай таарч, өрсөлдөгчөө цэвэр ялсан. Харин шөвгийн 16-гийн барилдаанд Швейцарын тамирчин Фабиан Кочертой таарч, ялагдал хүлээсэн.

-Завхан аймгийн Нөмрөг сумын харьяат “Хилчин” спорт хорооны тамирчин Ё.Басхүү жүдо бөхийн эрэгтэйчүүдийн -60 килограмм жингийн эхний тоглолтоо Беларусийн бөхтэй хийж, нэмэлт цагт цэвэр ялсан. Харин шөвгийн дөрвийн төлөөх барилдаанд тус жингийн аварга болсон Япон Улсын жүдоч Абэ Хифүмитэй таарч, ялагдал хүлээсэн юм. Улмаар дагах барилдаанд Италийн Мануэл Ломбардотой таарч, барилдан унаж, олимпын наадмаа өндөрлүүлсэн юм.

-Боксын эрэгтэйчүүдийн -63 килограмм жингийн шигшээ 32-ын тулаан болсон. Уг жинд Монгол Улсаа төлөөлөн оролцсон Б.Чинзориг эхний тулаандаа Узбекистаны тамирчин Элнур Абдураймовтой таарч, ядагдал хүлээв.

“Токио-2020” зуны олимпын 32 дахь наадмын хоёр дахь өдрийн тэмцээнүүдээс 18 настай олимпын аварга төрсөн. Тодруулбал, БНТУ-ын 18 настай усанд сэлэлтийн тамирчин Ахмед Хафнауи 400 метрийн өврөөр даллах сэлэлтийн тэмцээнд амжилттай оролцон түрүүлж, олимпын аварга болсон юм. Мөн Япон Улсын шигшээ багийн Абэ ах дүүс буюу эмэгтэйчүүдийн -52 килограмм жинд зодоглосон Абэ Үта, эрэгтэйчүүдийн -60 килограмм жинд зодоглосон Абэ Хифүми нар олимпын аварга болж, түү бүтээсэн билээ.