Наран улсын шилдэг жүдоч, Абэ ах дүүс дахин нэг түүх бүтээлээ. “Токио-2020” олимпын наадмын хоёр дахь өдрийн жүдо бөхийн эмэгтэйчүүдийн -52 килограммд Абэ Үта, эрэгтэйчүүдийн -60 килограмм жинд Абэ Хифүми нар алтан медаль хүртэж, ах дүү нар олимпын наадмын нэг өдөр, нэг татами дээр тэргүүлсэн анхны тохиолдол болж, дэлхий дахиныг гайхшруулаад байна.

-МӨРӨӨДЛИЙН ЭХЛЭЛ-

          Олимп, дэлхийн шилдгийн шилдэг хэмээгдэж буй Абэ ах, дүү гал унтраагч мэргэжилтэй жирийн нэгэн айлын гэр бүлд өсжээ. Ах Абэ Хифүми нь зургаан настайгаасаа жүдо бөхөөр хичээллэж, харин дүү Абэ Үта нь таван настайгаасаа жүдогоор хичээллэсэн юм. Энэ талаар нэгэн удаа Абэ Хифүми “Үта жүдог харсан анхны өдрөөсөө л энэ спортод дурласан” хэмээн дүүгийнхээ замналын эхлэлийн талаар ярьж байв. Одоо ах Абэ Хифүми нь 23 настай, дүү Абэ Үта нь 21 настай юм. Дүү нь “Токио-2020” олимпын наадам оролцох эрхээ авсан ч ах нь авч чадалгүй хэсэг хугацаа өнгөрүүлсэн. Тэгж явсаар Абэ Хифүми өнгөрсөн 2020 оны арванхоёрдугаар сард ээлжит зуны олимпод оролцох эрхээ хүртсэн юм. Тэр Японы шигшээ багийн хамгийн сүүлчийн буюу 14 дэх гишүүн болсон. Тэрбээр ээлжит зуны олимпын наадам эхлэхийн өмнө “Долдугаар сарын 25-нд дүү бид хоёрын гялалзах өдөр байх болно” гэж хэлж байв. Харин түүний хэлсэн үг худал байсангүй. Тэд олимпын дэвжээн дээр тодоос тод гэрэлтсэн юм.

-ТҮҮХ БҮТЭЭСЭН НЬ-

          Абэ Хифүми, Үта нар жүдо бөхийн “Баку-2018” Дэлхийн аварга шалгаруулах тэмцээнээс хоёулаа алтан медаль хүртэж байв. Магадгүй тэр үеийн амжилт өнөөгийн ах, дүү олимпын аваргууд “төрөх” боломжтой гэсэн таамгийг нэмэгдүүлсэн байх. Абэ Хифүми 21 насандаа “Токио-2014” их дуулгад түрүүлж, дүү Абэ Үта нь 18 насандаа Дэлхийн аварга шалгаруулах тэмцээнд түрүүлж байсан юм. Харин “Токио-2020” олимпын наадмын жүдо бөхийн эмэгтэйчүүдийн -52 килограмм жингийн барилдаан өндөрлөж, Абэ Үта олимпын аварга болсон. Гэхдээ дүүгийнх нь баяр хөөр, том амжилт нь ахад нь хүнд ачаа болж, очсон ч байж болох. Дүүгээ олимпын аварга болсны дараа Абэ Хифүми “Одоо л би дүүтэйгээ хамт олимпын алтан медалийг авахаар зорьж байгаагаа албан ёсоор хэлж чадахаар боллоо. Харин түүний ахын хувьд надад алдах эрх байхгүй” хэмээн олимпын аваргын төлөөх барилдаандаа орсон аж. “Токио-2020” зуны олимпын 32 дахь удаагийн наадмын хоёр дахь өдөр өндөрлөхөд ах, дүү хоёул олимпын наадмын алтан медалийн эзэд болсон юм.

Энэ тухай ах, дүү Абэгийн дүү нь болох Абэ Үта “Би бүтэн дөрвөн жилийн турш олимпын аварга болохын тулд бэлтгэлээ хийж байсан. Энэ бүхний эцэст олимпын аварга болох зорилгоо биелүүлсэндээ маш их баяртай байна. “Токио-2020” олимпын наадмын алтан медаль зөвхөн минийх бус миний ах Абэ Хифүми, манай гэр бүл, бид бүгдийнх юм” гэсэн юм.

Харин ах Абэ Хифүми нь “Дүүгээ түрүүлэхийг хараад би ч мөн өөрийгөө түрүүлэх ёстой гэж бодсон. Өнөөдөр болсон жүдо бөхийн жоёр жингийн барилдаанаас авсан хоёр алтан медалийг ах, дүү Абэ авч чадлаа. Дүү минь өнөөдөр надаас түрүүлж, финалдаж, олимпын аварга болсон. Дүүгээ аварга болохыг хараад дотор шатах шиг л болсон. Тэгээд “Заавал түрүүлэх ёстой” гэж бодоод хичээсэн. Цаашид олимпын аварга гэх нэр хүндээ дааж явахыг хичээх болно” гэжээ.

Хүн төрөлхтний эв найрамдлын бэлгэ тэмдэг болсон олимпын наадмын нэг өдөрт ах, дүү хоёр алтан медаль хүртэж, түүхэнд дахин тохиох эсэх нь эргэлзээтэй маш том түүх бүтээжээ. Цагийг эзэгнэсэн ах дүүсийн талаар гаднын хэвлэлүүд “Наран улсын нар урьд өмнө нь олимпын наадамд хэзээ ч ингэж гэрэлтэж байгаагүй. Ах, дүү Абэ Наран улсын бахархал болсон хамгийн том нарнууд байлаа” гэсэн байна.