32 дахь удаагийн “Токио-2020” зуны олимпын наадам үргэлжилж байна. Тус наадмын эхний өдрийн тэмцээнүүдээс БНХАУ-ын шигшээ баг дөрвөн медаль хүртэж, тэргүүлсэн бол Япон, Италийн шигшээ багууд хоёр, хоёр медальтайгаар удаалсан юм.

-“Токио-2020” олимпын наадмын эхний өдрийн ширээний теннисний эмэгтэйчүүдийн ганцаарчилсан төрөлд Монгол Улсын шигшээ багийн хамгийн залуу тамирчин Б.Болор-Эрдэнэ БНТУ-ын тамирчин Гарчи Фадваг ялж, дараагийн шатандаа Чили Улсын тамирчин Паулина Вегатай таарч, ялагдал хүлээв.

-Ширээний теннисний эрэгчүүдийн ганцаарчилсан төрөлд ОУХМ Э.Лхагвасүрэн эхний шатандаа Энэтхэг гаралтай АНУ-ын тамирчин Никил Кумартай таарч, 4:1 харьцаатайгаар хожигдсон.

-Буудлагын 10 метрийн хийн гар бууны эрэгтэйчүүдийн төрөлд Э.Даваахүү оролцсон. Тэрбээр зургаан удаагийн гараанаас нийт 577 оноо авч, тухайн төрлийн 12 дугаар байрт бичигдсэн юм. Ташрамд дурдахад, дуудлагын 10 метрийн хийн гар бууны эрэгтэйчүүдийн төрлийн финал шалгарсан тамирчин Э.Даваахүүгээс ердөө нэг оноогоор илүү байжээ.

-Буудлагын 10 метрийн хийн урт бууны эмэгтэйчүүдийн төрөлд О.Есүгэн өрсөлдсөн. Тэрбээр зургаан удаагийн гараанаас нийт 624 оноо авч, тухайн төрөлдөө 25 дугаар байрт жагссан юм.

-Зуны олимпын наадмын багийн спортын төрөлд Монгол Улсыг төлөөлж, анх удаа оролцож байгаа сагсан бөмбөгийн 3х3 төрлийн эмэгтэйчүүдийн шигшээ баг наадмын эхний өдөр хоёр тоглолт хийсэн. Эхний тоглолтод 2018 оны дэлхийн аварга Итали Улсын шигшээ багтай таарч, 15:14 онооны харьцаатайгаар ялагдал хүлээсэн. Хоёр дахь тоглолтоо АНУ-ын шигшээ багийн эсрэг хийж, 21:9 онооны харьцаатайгаар хожигдсон.

-Ээлжит зуны олимпын наадын эхний өдөр Монголын боксчдоос Гавьяат тамирчин Э.Цэндбаатар эхний тулаанаа хийсэн. Тэрбээр Кенийн боксчин, Африк тивийн аварга Николас Окоттой таарч, 3:2-ын харьцаатайгаар ялалт байгуулж, шөвгийн 16-д шалгарсан.

-Жүдо бөхийн эмэгтэйчүүдийн -46 килограмм жингийн тэмцээнд Монгол Улсын Хөдөлмөрийн баатар, Гавьяат тамирчин М.Уранцэцэг барилдаж, өөрийн замнал дахь анхны болон Токиогийн олимпоос Монголын шигшээ багийн анхны медалийг хүртсэн. Тэрбээр эхний шатандаа гоц мөргөж, хоёр дахь шатанд Чилийн бөх Мэри Ди Варгас Лейг, гурав дахь шатандаа Израилийн тамирчин Ришона Шираг тус тус цэвэр ялсан. Харин шөвгийн дөрвийн барилдаандаа Косовогийн Димитрия Краскинид унасан. Улмаар хүрэл медалийн төлөө Португалийн жүдоч Катарина Коштатай барилдаж, цэвэр ялалт байгуулж, хүрэл медаль хүртсэн билээ.

“Токио-2020” 32 дахь удаагийн зуны олимпын наадмын анхны алтан медалийг БНХАУ-ын шигшээ баг хүртсэн. БНХАУ-ын тамирчин Ян Цянь эмэгтэйчүүдийн 10 метрийн хийн урт бууны төрөлд оролцож, 251.8 оноо авч, олимпын наадмын түүхэн дээд амжилтыг тогтоож, алтан медаль хүртсэн. Мөн тус улсын шигшээ багийн тамирчин Хоу Жихуй эмэгтэйчүүдийн хүндийг өргөлтийн төрөлд 210 килограммыг өргөж, олимпын наадмын дээд амжилтыг шинэчлэн алтан медаль хүртсэн. БНХАУ-ын тамирчин Сунь Ивэн туялзуур сэлмийн төрлийн аваргын төлөө Румын Улсын тамирчин Ана Мария Попескутай тулалдаж, 11:10 харьцаатайгаар ялалт байгуулж, БНХАУ-ын шигшээ баг олимпын наадмын эхний өдрөөс гурван алтан медаль хүртсэн. Харин ээлжит зуны олимпын наадмыг зохион байгуулж байгаа Япон Улсын анхны алтан медалийг жүдо бөхийн эрэгтэйчүүдийн -60 килограмм жинд зодоглосон Наохиса Такато авч, ирсэн байна