Домогт бөх хүрэл медаль хүртлээ

2021-07-24, 654

Монгол Улсын Хөдөлмөрийн баатар, Гавьяат тамирчин, жүдо бөхийн ОУХМ М.Уранцэцэг хүн төрөлхтний эв найрамдлын бэлгэ тэмдэг болсон олимпын наадмаас анхны медалиа хүртлээ. Тэрбээр “Токио-2020” зуны олимпын наадмын эмэгтэйчүүдийн жүдо бөхийн -48 килограмм жингийн эхний шатандаа гоц мөргөж, хоёр дахь шатандаа Чилийн бөх Мэри Ди Варгас Лейг, гурав дахь шатанд Израилийн тамирчин Ришони Шираг тус тус цэвэр ялсан юм. Харин шөвгийн дөрвийн барилдаанд Косовогийн Димитрия Красникид унаж, улмаар хүрэл медалийн төлөө Португалийн тамирчин Катарина Коштаг цэвэр ялж, өөрийн замналынхаа анхны, Монгол Улсын Токиогийн олимпоос авч буй анхны медалийг авав.

Монгол түмэн Мөнхбатын Уранцэцэгт итгэж, омогшиж, хайрлаж, давахад нь хамт давж, унахад нь хамт унасаар 10 гаруй жилийн хугацааг өнгөрөөжээ. Энэ хугацаанд монгол түмнийхээ итгэлийг алдаж үзээгүй М.Уранцэцэг энэ удаад ч алдсангүй.

Бага наснаасаа л үндэсний бөхөөр хичээллэж, аавыгаа дагаад л спорт заалуудаар биенээсээ ч том цүнх үүрээд явдаг байсан тухай аав А.Мөнхбат нь манай сайтад өгсөн ярилцлагадаа дурдсан нь бий. Тэрбээр “Би өөртэйгөө адилхан бөх болгох гээд дэмжээд л байлаа. Ээж нь охиноо мисс болгох гээд зөрүүдэлж байхгүй юу. Би чинь “бүдүүн хар” хүн шүү дээ. Өөртэйгөө л адилхан болгох гээд зүтгээд байсан хэрэг” гэсэн юм. Монголынхоо нэрийг “нуруундаа үүрч” явдаг дэлхийн тамирчин өнөөдөр дахин нэг түүх бүтээлээ.

Монгол Улсын Хөдөлмөрийн баатар М.Уранцэцэг 1990 онд Баянхонгор аймгийн Баян-Овоо суманд төрсөн. Багаасаа бөхөөр хичээллэж, 2006 онд “Женко” клубын тамирчин болж, 2008 оны УАШТ-д түрүүлж байсан юм. Тэр цагаас хойш М.Уранцэцэг тив, дэлхийн олон тэмцээнд эх орныхоо нэрийг дуудуулсан билээ. Тэрбээр 2010 оны арванхоёрдугаар сарын 17-ноос 2019 оны дөрөвдүгээр сарын 5-ны хооронд Олон улсын жүдо бөхийн холбооны цуврал тэмцээнүүдээс 11 алт, 11 мөнгө, 23 хүрэл медаль хүртэж, хамгийн олон медаль хүртсэн Гиннесийн дээд амжилт тогтоосон юм.

Түүний амжилтаас:

2009 онд ”Улаанбаатар” дэлхийн цом мөнгөн медаль
2010 онд ”Ташкент” дэлхийн цом алтан медаль
2010 онд ”Сувон” дэлхийн цом алтан медаль
2010 онд ”Чиндао” гранпри хүрэл медаль
2011 онд "Оберварт” дэлхийн цом мөнгөн медаль
2011 онд ”Баку” гранпри мөнгөн медаль
2011 онд ”Улаанбаатар” дэлхийн цом алтан медаль
2012 онд ”Парис” их дуулга хүрэл медаль
2012 онд Азийн аварга шалгаруулах тэмцээн алтан медаль
2012 онд ”Чиндао” гранпри хүрэл медаль
2013 онд “Парис” их дуулга хүрэл медаль
2013 онд ”Оберварт” Европын нээлттэй тэмцээн алтан медаль
2013 онд Азийн аварга шалгаруулах тэмцээн хүрэл медаль
2013 онд ”Улаанбаатар” гранпри алтан медаль
2013 онд ”Рио” Дэлхийн аварга шалгаруулах тэмцээн алтан медаль
2013 онд ”Абу даби” гранпри хүрэл медаль
2013 онд ”Токио” их дуулга мөнгөн медаль
2014 онд ”Парис” их дуулга мөнгөн медаль
2014 онд ”Ром” Европын нээлттэй тэмцээн хүрэл медаль
2014 онд ”Дюсселдорф” гранпри мөнгөн медаль
2014 онд ”Баку” их дуулга алтан медаль
2014 онд ”Улаанбаатар” гранпри алтан медаль
2014 онд ”Инчон” Азийн наадам алтан медаль
2014 онд ”Абу даби” их дуулга алтан медаль
2015 онд ”Дюсселдорф” гранпри мөнгөн медаль
2015 онд Азийн аварга шалгаруулах тэмцээн мөнгөн медаль
2015 онд ”Морокко” мастерс алтан медаль
2015 онд ”Ташкент” гранпри алтан медаль
2015 онд ”Парис” их дуулга алтан медаль
2015 онд ”Чиндао” гранпри мөнгөн медаль
2016 онд ”Парис” их дуулга мөнгөн медаль
2016 онд ”Дюсселдорф” гранпри хүрэл медаль
2016 онд Азийн аварга шалгаруулах тэмцээн мөнгөн медаль
2016 онд ”Улаанбаатар” гранпри алтан медаль
2016 онд ”Рио-2016” олимпын наадмын тавдугаар байр
2016 онд ”Абу даби” их дуулга хүрэл медаль
2016 онд ”Токио” их дуулга хүрэл медаль
2017 онд ”Парис” их дуулга мөнгөн медаль
2017 онд Азийн аварга шалгаруулах тэмцээн алтан медаль
2017 онд ”Хөххот” гранпри хүрэл медаль
2017 онд ”Будапешт” Дэлхийн аварга шалгаруулах тэмцээн мөнгөн медаль
2017 онд ”Ташкент” гранпри алтан медаль
2017 оны гранпри хүрэл медаль
2017 онд ”Токио” их дуулга мөнгөн медаль
2017 онд ”Петербург” мастерс хүрэл медаль
2018 онд ”Парис” их дуулга хүрэл медаль
2018 онд ”Хөххот” гранпри хүрэл медаль
2018 онд ”Жакарта” Азийн наадам хүрэл медаль
2018 онд ”Абу даби” их дуулга алтан медаль
2018 онд ”Осака” их дуулга мөнгөн медаль
2019 онд ”Тбилис” гранпри хүрэл медаль
2019 онд ”Анталья” гранпри мөнгөн медаль
2019 онд ”Токио” Дэлхийн аварга шалгаруулах тэмцээн хүрэл медаль
2020 онд ”Парис” их дуулга хүрэл медаль
2021 онд ”Доха” мастерс хүрэл медаль
2021 онд ”Ташкент” их дуулга алтан медаль
2021 онд ”Тбилис” их дуулга алтан медаль
2021 оны Дэлхийн аварга шалгаруулах тэмцээн хүрэл медаль
2021 онд “Токио-2020” олимпын наадмын хүрэл

Домогт бөх хүрэл медаль хүртлээ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.