МУГТ, Хөдөлмөрийн баатар М.Уранцэцэг хүрэл медалийн төлөө Португалийн Катарина Коштатай барилдаж өчилтөөр цэвэр ялснаар олимпоос хүрэл медаль хүртлээ. Энэ бол Монгол Улсын Токиогийн олимпоос авч буй анхны медаль юм. Мөн ДАШТ-ын дөрвөн медальт М.Уранцэцэгийн олимпын анхны медаль билээ.

   Тэрбээр эхний шатанд гоц мөргөж, шигшээ  16-гийн барилдаанд Чилийн бөх Мэри Ди Варгас Лейтэй барилдаж гарт нь өчиж цэвэр ялсан. Үүний дараа шөвгийн наймын барилдаанд Изралийн бөх Ришони Шираг мөн өчилтөөр цэвэр ялсан. Ийнхүү хэсгээ тэргүүлэн, шөвгийн дөрвийн барилдаанд Косовогийн Димтриа Красникитэй барилдаж, ялагдсан юм. Улмаар хүрэл медалийн төлөө барилдаж, цэвэр ялалт байгуулав.