Дэлхийн анхны олимпын наадмыг эртний Грекийн Олимпиад МЭӨ 776 он буюу одоогоос 3000-аад жилийн өмнө зохион байгуулжээ. Уг наадамд зөвхөн эрчүүд оролцдог байсан бөгөөд гэрлэсэн эмэгтэйчүүд оролцохыг хориглодог байжээ. Эл олимпын наадмыг Зевс бурхныг хүндэтгэн дөрвөн жилд нэг удаа уламжлал болгон наймдугаар сарын 6-наас есдүгээр сарын 19-ны хооронд зохион байгуулдаг байв. Тухайн үеийн олимпын наадмын цор ганц тэмцээн нь гүйлт байжээ. Ийнхүү анхны олимпын наадмын аваргаар Короебус хэмээх тогооч тодорсон байна.

Олимпын анхны наадмуудыг зөвхөн гүйлтийн төрлөөр зохион байгуулж байгаад МЭӨ 708 онд таван төрөлт тэмцээн, 400 метр болон 1500 эсвэл 5000 метрийн холын зайн гүйлт зохион байгуулах болжээ. Олимпын наадмын таван төрөлтөд гүйлт, бөх барилдаан, уртын харайлт, зээрэнцэг шидэлт, бөөрөнцөг түлхэлт багтдаг байсан аж. Харин МЭӨ 688 нударган зодоон, МЭӨ 680 онд морин уралдаан нэмэгдсэн байна. Гэвч 290 удаа зохиогдож, мянга гаруй жилийн нүүр үзсэн олимпыг МЭ 394 онд Ромын хаанчлалын үед Феодосе хаан хоригложээ. Улмаар 15 зууны турш дахин олимп болоогүй аж.

   Ийнхүү XIX зууны сүүлч буюу 1896 оны Грекийн Афин хотноо орчин үеийн анхны олимпыг зохион байгуулсан аж. Олимпын наадмыг дахин сэргээх үйлсийг санаачлан Олон улсын олимпын хороог үүсгэсэн хүн бол Францын эрдэмтэн Пьер де Кубертун байлаа. Тэрээр 1894 онд Олон улсын олимпын хороог байгуулж, хоёр жилийн дараа олимпын өлгий нутаг Грект орчин үеийн олимпын наадмыг зохион байгуулахаар товлосон ч түүнийгээ үзэж чадалгүй нас нөгчжээ. Тус олимпод 12 үндэстний төлөөлөл 280 тамирчин 43 төрөлд оролцсон байна.

Зураг2.1896 оны дөрөвдүгээр сарын 6-нд Афины олимп 100 метрийн гүйлтээр эхэлж байна 

Б.Бадамзул