"Токио-2020" зуны олимпийн наадамд оролцох монголын багийн эхний хэсэг болох бокс, сагсан бөмбөгийн шигшээ багийн тамирчид өчигдөр Токио хотноо буулаа. Тодруулбал, Бокс, 3х3 сагсан бөмбөгийн шигшээ баг болон сэтгүүлчдийн төлөөлөл, МҮОХ-ны штабын ажилтнууд бүхий 25 хүний бүрэлдэхүүнтэй баг Японд очоод байна. Токиод хүрэлцэн очсон төлөөлөгчдийг нарийн хяналт шалгалтын дор цааш нэвтрүүлж байгааг багийн гишүүд мэдээлэв. 

Эмэгтэй сагсан бөмбөгийн багийн бүрэлдэхүүнд Б.Солонго, Д.Ганзул, О.Хулан, Э.Чимэддолгор, М.Цэрэнлхам, Б.Болор-Эрдэнэ нар багтаад буй бөгөөд тэднээс дөрөв нь олимпийн наадамд улсаа төлөөлөн тоглох юм. Боксын тамирчдын хувьд долдугаар сарын 22-ныг хүртэл Шизүока мужийн Шимада хотод, 3х3 сагсан бөмбөгийн баг тамирчид 19-нийг хүртэл Яйзү хотноо бэлтгэлээ хийх аж. 

"Токио-2020" зуны XXXII олимпын наадмын нээлтийн үйл ажиллагаа энэ сарын 23-нд болох бөгөөд тэмцээнүүд 21-ний өдөр хөл бөмбөг, бэйсбол, гимнастикийн төрлөөр эхэлнэ. Харин бокс болон 3х3 сагсан бөмбөгийн тэмцээн 24-ний өдөр эхлэх хуваарьтай байна.

Н.АРИУНСАЙХАН