“Токио-2020” олимпын наадамд Монголын 43 тамирчин өрсөлдөх эрхээ аваад байгаа. Тэгвэл түүхэндээ анх удаа эмэгтэй тамирчид багийн бүрэлдэхүүний дийлэнх хувийг бүрдүүлжээ.

Тухайлбал, “Токио-2020” олимпод 25 эмэгтэй, 18 эрэгтэй тамирчин улсаа төлөөлөн өрсөлдөхөөр болж, эмэгтэй тамирчид Монголын багийн бараг 60 хувийг бүрдүүлсэн байна.

Эмэгтэй тамирчид олонх полсон гол шалтгаанд 3х3 сагсан бөмбөгийн эмэгтэй баг олимпын эрхээ авсан, чөлөөтийн охид бүх жинд өрсөлдөхөөр болсон, хүндийг өргөлт, буудлагад эмэгтэй тамирчид илүү эрх авсан зэрэг нь нөлөөлсөн байна.

Өмнө нь Бээжингийн олимпод тамирчдын хүйсийн харьцаа 50:50 буюу 14 эрэгтэй, 14 эмэгтэй тамирчин оролцож байв. Харин бусад олимпод ямагт эрчүүд давамгайлсаар иржээ. 1972, 1976 оны олимпод ердөө хоёрхон эмэгтэй тамирчин улсаа төлөөлөн оролцож байсан юм.