Мэргэжлийн боксын рингэн дээр “Хаан Төөг” хочтой, сонирхогчдын боксын Олимп, Дэлхийн аварга шалгаруулах тэмцээний мөнгөн медальт Нямбаярын Төгсцогт  мэргэжлийн боксын 14 дэх тулаанаа өнөөдөр хийх гэж байна. Тэрбээр, 2015 оноос мэргэжлийн боксын рингэнд тулалдаж эхэлсэн бөгөөд өнгөрсөн хугацаанд 13 тулаан хийснээс 12-т нь ялалт (9 КО) байгуулж, 57.2 кг  жинд (126 lbs) IBO холбооны аварга болж, WBC холбооны аваргын бүсийн төлөө тулалдаж байсан билээ.

    Тэрбээр мэргэжлийн боксын 14 дэх тулаанаа өнгөрсөн тавдугаар сард Кубын нэрт боксчин Юриоркис Гамбоатай хийх байсан ч, өрсөлдөгч нь бэлтгэлийн үеэр хавиргандаа бэртэл авсны улмаас тоглолтоо цуцласан. Үүний дараа Н.Төгсцогтод мэргэжлийн рингэн дээрх 15 тулаандаа нэг ч ялагдал амсаагүй Крис Колберт тулалдах санал тавьсан юм. Ийнхүү тэдний тулааныг Америкийн SHOWTIME суваг Америкийн баруун эргийн цагаар оройн 18.00 цагаас шууд дамжуулна. Энэ үдшийн хамгийн гол тулаан Төгсцогт-Кольберт нарын дунд болох юм.