ТАНИЛЦ: Токиог зорих буудлагын ТАМИРЧИД

2021-06-08, 2319

“Токио-2021” зуны олимпын XXXII наадамд эхлэхэд 45 хоног үлдээд байна. Манай улсыг төлөөлөн спортын долоон төрөлд 21 тамирчин оролцохоор эрхээ авч бэлтгэлээ хангаж байгаа билээ. Тэгвэл бид олимпын наадмыг зорихоор болсон буудлагын спортын багийн бүрэлдэхүүнийг танилцуулж байна.

Долоо дахь олимпдоо оролцох гэж буй О.ГҮНДЭГМАА

Монголын буудлагын спортын тамирчдаас эрэгтэй нэг, эмэгтэй гурван тамирчин “Токио-2021” олимпын наадмыг зорихоор болсон. Тэдний нэг нь Монгол Улсын Хөдөлмөрийн Баатар О.Гүндэгмаа бөгөөд долоо дахь олимпдоо оролцох гэж байна. 1978 онд Улаанбаатар хотод төрсөн. Түүний хувьд 1993 оноос буудлагын спортоор хичээллэж эхэлсэн. Улмаар 18 настайдаа 1996 оны Атлантын олимпд оролцсон. Түүнээс хойш ийнхүү долоо дахь олимпдоо оролцох гэж буй нь энэ юм. 1998 онд О.Гүндэгмаа Д.Мөнхбаяр, Д.Оюун нарын хамт ДАШТ-ий багийн төрлөөс хүрэл медаль, 2006 онд 25 метрийн хийн гар бууны хувийн төрлөөр хүрэл медаль авсан. 2002, 2006 онд Азийн наадмын хувийн болон багийн төрлөөр хүрэл медаль хүртсэн. Ази тивийн аварга, Дэлхийн цомын шигшээ тэмцээний аварга, дэлхийн цомын цувралуудын алт, мөнгө, хүрэл медальтай.

Мөн тэрбээр 28 жилийн дараа буюу Москвагийн олимпын наадмаас хойш олимпоос мөнгөн медаль хүртсэн Монгол тамирчин болсон. Ийнхүү Монголын буудлага спортын түүхийг гурван арванд бичилцэж яваа О.Гүндэгмаа буудлагын спортын залуу үеийн төлөөлөл болсон гурван тамирчны хамт “Токио-2021”-ыг зорих юм.

Монгол Улсад “Токио-2021” олимпын анхны эрхийг авчирсан Ц.АНУДАРЬ

Үндэсний шигшээ багийн тамирчин Ц.Анударь нь 1997 онд Улаанбаатар хотод төрсөн. Түүний хувьд 2014 оноос техник спорт сургалтын төвд Б.Алтанцэцэг багшийн удирдлага дор буудлагын спортоор хичээллэж эхэлсэн. 2017 оноос Д.Лхадорж багшийн удирдлага доор бэлтгэл сургуулилтаа базааж байна.

Тэрбээр монгол тамирчдаас “Токио-2021” олимпийн наадмын анхны эрхийг 2019 оны Бээжингийн дэлхийн цомын аваргаас эх орондоо авчирсан. Энэхүү тэмцээн нь түүний насанд хүрэгчдийн ангилалд орсон анхны олон улсын тэмцээн байсан. Улмаар 578 оноо авч олимпд оролцох эрхийн эзэн болсон юм. Ц.Анударь нь гар бууны төрөлд олимпийн наадамд өрсөлдөнө.

Буудлагын эрчүүдийг олимпод төлөөлөх Э.ДАВААХҮҮ

Үндэсний шигшээ багийн тамирчин Э.Даваахүү “Токио-2021” олимпын наадмын гар бууны төрөлд оролцоно. Энэ удаагийн олимп түүний анхны олимпийн наадам юм. Тэрбээр 1989 онд Налайх дүүрэгт төрсөн. 2008 онд Техник спортын төвд гавьяат дасгалжуулагч Ц.Өлзийбаярт шавь орж буудлагын спортоор хичээллэж эхэлсэн бөгөөд одоог хүртэл удирдлагад нь бэлтгэл сургуулилалтаа хийж буй. Э.Даваахүү буудлагын спортоор хичээллээд нэгхэн жилийн дараа буюу 2009 онд Хонконгод болсон Зүүн Азийн тоглолтын үеэр Монгол Улсын дээд амжилтыг шинэчлэн тогтоож, Олон улсын хэмжээний мастер цолны болзол хангаж байсан юм. Түүний хувьд 2019 онд Бээжин хотод болсон Дэлхийн цомын аварга шалгаруулах тэмцээнд тавдугаар байрт орж олимпын эрхээ өвөртөлсөн билээ.

Урт бууны О.ЕСҮГЭН

Үндэсний шигшээ багийн тамирчин О.Есүгэн 1999 онд Улаанбаатар хотод төрсөн. Анх 2013 онд Техник спортын төвийн урт бууны дасгалжуулагч Б.Энхжаргалын шавь болсон. Харин одоо үндэсний шигшээ багийн дасгалжуулагч Ж.Ганхуягын удирдлагад бэлтгэлээ хийж байна. Буудлагын спортоор хичээллэж эхлээд нэг жилийн дараа спортын мастер цолны болзол хангаж байсан түүний хувьд 2019 оны Катарт болсон Ази тивийн аварга шалгаруулах тэмцээний 10 метрийн урт бууны төрөлд 626.5 оноогоор олимпын эрхээ авсан билээ.

ТАНИЛЦ: Токиог зорих буудлагын ТАМИРЧИД

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2

Сэтгэгдэл үлдээсэн: 2021-06-08 21:40:07

Ганболд: Б биш Сайн- Эрийн Энхжаргал дасгалжуулагч
Сэтгэгдэл үлдээсэн: 2021-06-08 16:02:10

Д.Миронов ДУА.: Та бүхэндээ баяр хүргэж,амжилт хүсье.