Сагсан бөмбөгийн 3×3 төрлийн эрэгтэй багийнхан олимпын эрх авах тэмцээнээ 16:15-аар Бельгийн багт хожигдож, өндөрлүүллээ. Тэдний хувьд 2018 онд 3х3 сагсан бөмбөгийн ДАШТ-д шилдэг найман багийн нэгээр тодорч монголчууд бид анх удаагаа багийн спортоор амжилт гаргаж болохыг харуулсан билээ.

2019 оны арваннэгдүгээр сарын 1-нд FIBA-аас олимпын эрх авах дөрвөн багийн нэрийг зарлахад манай эрэгтэй шигшээ баг багтсан боловч Япон улс зохион байгуулагчийн давуу эрхээ ашиглан эрэгтэй шигшээ багаа олимпд оролцуулах болсноор манай баг эрхийн төлөөх тэмцээн оролцохоор болсон байдаг. Харин өнөөдөр бид аваад алдсан олимпын эрхийнхээ үзүүрээс атгаад алдлаа.

Гэсэн ч бид олимпын наадамд анх удаагаа багийн спортын төрлөөр багаа дэмжих болно. Учир нь 3х3 сагсан бөмбөгийн эмэгтэй шигшээ баг олимпын эрхээ аваад байгаа билээ.

М.Дуламсүрэн