Ардын жүжигчин Г.Равдан гуайн бүтээсэн олон сайхан дүрд бид хайртай байдаг билээ. Анхны дүр нь "Сахиус уу, сахиул уу" киноны Алтангэрэл. Мэдээж сургуулиа төгсөөд, театрт ажиллаж байгаад кинонд тоглох, бүр тагнуулчийн дүрд ажиллах даалгавар авсан нь амаргүй сорилт байсан нь мэдээж. Энэ тухай тэрбээр "Сахиус уу, сахиул уу" кинонд Монголын тагнуулч Алтангэрэл Японд очиж, хошууч Хаяаши нэрээр тагнуул хийх болдог. Анх удаа дэлгэцэд дүр бүтээж буй надад ярвигтай байсан. Нэг ёсондоо хоёр дүр зэрэг бүтээж байна гэсэн үг шүү дээ. Хоёр хүний дотоод ертөнцийг зэрэг илэрхийлнэ гэдэг мань мэтийн туршлага нимгэн жүжигчинд бол бардаггүй даваа байна лээ дээ" гэж байжээ. Нэрт найруулагч Б.Сумхүү ээдрээтэй, арга, ухаан самбаачлахгүй л бол бүтэлгүйтэж, эрсдэж мэдэх энэ дүрийг түүнд өгөхдөө цаашид ямархан уран бүтээлч болох вэ гэдгийг нь давхар шалгасан байж ч мэдэх юм. 

  Ингээд тэр "Ацаг шүдний зөрөө"-гийн Заяат, "Сүүдэр"-ийн Дугар, "Мандах нарны туяа"-гийн Даш, "Би нисэх дуртай"-гийн Мөнгөн, "Мандухай цэцэн хатан"-ы Лава, "Алтан шонхор" киноны Хажир бөө, "Тод магнай"-н Нэрэндоо, "Мөнх тэнгэрийн хүчин дор"-ын Мухулай, "Хааны сүүлчийн хатан"-ы Цогбадрах зэрэг дүрийг амилуулсан.

Энэ жилийн "Улаанбаатар" олон улсын кино наадмын үеэр Б.Балжинням найруулагчийн "Сүүдэр" киног анх удаа өргөн дэлгэцээр үзлээ. Ээжийгээ өөр хүнтэй ханилж буйд Сандаг хүү ихэд дурамжхан байна. Үүнийгээ "Ээж ээ, та хэнд ч хайргүй. Аавд ч, надад ч, харин тэр Дугарт л..." гэх үгээр шулуухан илэрхийлнэ. Дугарт монголчууд хайртай. Хэдийгээр хүний хүүхдийг алагчлан үздэг, өөрийн мэт хайрладаггүй хүмүүс байдаг ч Дугар тийм биш. Түүнд хүний дайтай хүн шиг амьдрах гэсэн чин сэтгэл, мөрөөдлөөс өөр зүйл байгаагүй. Даанч Сандаг энэ бүхнийг хожуу ойлгодог нь үзэх тусам сэтгэл өвтгөдөг. Мэдээж энэ нь ч Сандагийн буруу биш. Г.Равдан жүжигчин "Сүүдэр" киноныхоо талаар "Дугарын тухайд дотор хүнтэйгээ тэрсэлдэж, хамаг сэтгэлийн тэнхээгээ барж, өөрөө өөрийгөө яллаж, үйл лайгаа үзэж яваа хүн" гэсэн байдаг.                             

   Харин бид "Би нисэх дуртай" киноны Мөнгөн эмчийн дүрд тун таагүй ханддаг. Үргэлж л эргэлзэж тээнэгэлзэж, эргэж, буцаж, хаачихаа мэдэхгүй яваа тийм нэг олхиогүй эрийн дүр. Тэр хорь гарчихсан залуу биш, дөч шүргэж дөрөө дарж яваа шахам насных. Хэдийнэ амьдрал, ажил нь тогтворжиж, эв дүйгээ олсон байх насандаа ч тэр олигтой шийдвэр, овоохон дориун зан гаргаж чадахгүй байсаар кино дуусдаг. Тийм ч хүн бидний дунд бишгүй. Энэ дүрээ "Би нисэх дуртай” киноны Мөнгөний тухайд “Хоёулаа юу?” гэдэг ганцхан үгэндээ бүдэрч, насаараа төлж барамгүй сэтгэлийн өр, шаналантай үлдэж буй бардам эмчийн дүр л дээ" гэж. Гэхдээ Мөнгөн эмч ажил мэргэжилдээ гаргууд, хариуцлагатай. Эргэлзээ нь л түүнийг насаараа шаналантай үлдээж буй. 

 Түүний бүтээсэн бас нэгэн сонирхолтой дүр бол "Алтан шонхор"-ын Хажир бөө. Г.Жигжидсүрэн найруулагчийн энэ бүтээлийн тухай "Жийгээ найруулагч надаас Хажир зайран гарч ирнэ гэж бодсон байх" гэсэн байх бөгөөд дараа нь мөн "Мөнх тэнгэрийн хүчин дор" кинонд бөөгийн дүрд тоглодог.