“Улаанбаатар” олон улсын кино наадмыг Монгол Улсын нийслэл Улаанбаатар хотод 19 дэх жилдээ зохион байгуулж байна. Энэ удаагийн “Улаанбаатар” олон улсын кино наадмыг өчигдөр Финляндын “Зургадугаар бүхээг” киногоор нээсэн. Кино наадам энэ сарын 24-нийг дуустал үргэлжлэх юм.

Уншигч та бүхэнд “Улаанбаатар” олон улсын кино наадмын өнөөдрийн үзвэрүүдийг танилцуулж байна.

Халимч хүү

Найруулагч: Филипп Юрьев

Дүрүүдэд: Кристина Асмус, Владимир Онохов, Мария Чупринская

          Чукотка Аляскийн дунд байдаг Берингийн хоолойн жижигхэн тосгонд Лешка хүү амьдардаг. Лешка дэлхийн алс хязгаарт ямар ч үйл явдал болдоггүй тосгоны өсвөр насны хүү. Гэвч тосгонд интернет ирснээр эротик чат хийдэг вэб хуудаснаа бүжиглэх сайхан хүүхнүүдийг дэлгэцээр үзэхээр тосгоны ихэнх эрчүүд саравчинд цугладаг болов. Ихэнх эрчүүдэд энэ нь хөнгөн зугаа болж байгаа ч Леүка үүнийг нухацтай хүлээн авч, онлайн чатад учирсан хөөрхөн охинд дурлана. Анхны дурлал нь түүнийг танигдахын аргагүй болгон өөрчилж, камерт гарах охиныг бодит амьдрал дээр олохоор шийдсэнээр Лешкаг галзуу аялал угтах болно.

2021.10.19-ний 18:00 цагаас “Улаанбаатар” олон улсын кино наадамд

Эцгийн халамж

Найруулагч: Кира Коваленко

Дүрүүдэд: Милана Агузарова, Арсен Хетагурво, Милана Пагуева

          Хойт Осетинскын уул уурхайн тосгон Мизурын залуухан эмэгтэй Ада өөрийн хайртай гэр бүлээс, эцгийнхээ хатуу гараас зугтахыг оролдоно. Гэвч байдал санаснаас хэцүү болж хувирна.

2021.10.19-ний 20:30 цагаас “Улаанбаатар” олон улсын кино наадамд

Сүүлийн “Хонгор Болгар” алим

Найруулагч: Алексей Федорченко

Дүрүүдэд: Евгений Сангажиев, Николай Коляда, Олег Ягодин

          Кино зохиолыг зохиолч Михаил Зощенкогийн “Нар мандахаас өмнө” номонд үндэслэн бичжээ. Тус кинонд 1943 Казахстаны Алма-Ата хотод өрнөх түүхийг өгүүлнэ. Киноны гол дүрийн баатар буюу жимс тариалагч залуу эмчилгээний төрлийн алим сэргээж, хачин жигтэй гэмт хэрэг мөрдөн шалгаж эхлэх юм.

2021.10.19-ний 20:30 цагаас “Улаанбаатар” олон улсын кино наадамд