Монгол Улсын Засгийн газрын ээлжит бус хуралдаан үргэлжилж байна. Хуралдаанаар 10 орчим асуудал хэлэлцэхээр төлөвлөгджээ. Үүний хүрээнд хүүхдийн эрхтэй холбоотой багц асуудлыг хэлэлцсэн байна. Тухайлбал,

     1.Үндэсний соёл амралтын хүрээлэн буюу хүүхдийн паркийг зориулалтын бус аргаар ашиглахыг хориглох, хэрвээ зориулалтын бус хэлбэрээр ашигласан тохиолдолд төр, хувийн хэвшлийн эрхийг цуцлах шийдвэрийг Ерөнхий сайд Л.Оюун-Эрдэнэ Нийслэлийн Засаг дарга бөгөөд Улаанбаатар хотын  Захирагч Д.Сумъяабазарт даалгасан байна.

     2. “Найрамдал” олон улсын хүүхдийн зусланд бүрэн засвар хийж, тухайн газар нутагт газар олгохгүй байх үүрэг чиглэлийг Хөдөлмөр, нийгмийн хамгааллын сайд А.Ариунзаяа болон Нийслэлийн Засаг дарга бөгөөд Улаанбаатар хотын  Захирагч Д.Сумъяабазарт даалгалаа. Мөн “Найрамдал-2” зуслан барихаар зураг төслийн ажил үргэлжилж байгаа аж.

     3. Нийслэлийн Баянзүрх дүүргийн IV хороонд байрлах Жанжин Лхагвасүрэнгийн гудамж, Жуковын талбайд аж ахуйн нэгжүүдэд олгосон газар эзэмших эрхийг цуцалж, иргэдийн чөлөөт цагаа зөв боловсон өнгөрүүлэх, нийтийн эдэлбэр газар болгон тохижуулахыг Нийслэлийн Засаг дарга бөгөөд Улаанбаатар хотын Захирагч Д.Сумъяабазарт даалгалаа.

    4. Улаанбаатар хот дахь амаржих газруудын ачааллыг бууруулах зорилгоор Хоёрдугаар төрөх эмнэлгийн барилгыг бүрэн засварлах, өргөтгөл хийх, мөн ЭХЭМҮТ-д бүрэн засвар хийх ажлыг 2022 оны улсын төсөвт тусгуулах үүргийг Нийслэлийн Засаг дарга бөгөөд Улаанбаатар хотын  Захирагч Д.Сумъяабазарт даалгалаа.

    5. Хүүхэд, залуусын хөгжлийн зориулалттай баригдсан төр, хувийн хэвшлийн эзэмшилд байгаа барилга, байгууламжийг цаашид зориулалтын дагуу ашиглахаар төр, хувийн хэвшлийн хамтын ажиллагааны хүрээнд шийдвэрлэх үүргийг Нийслэлийн Засаг дарга бөгөөд Улаанбаатар хотын  Захирагч Д.Сумъяабазарт даалгасан байна.