Зөв хүн электорат эвслээс дэвшүүлсэн мөрийн хөтөлбөрт хамтран зүтгэгчдийн хүсэл мөрөөдлийг тусгасан учир би Ерөнхийлөгчийн сонгуульд нэр дэвшиж байна. Энэ удаагийн сонгуулиар бид Монгол Улсынхаа ардчиллыг хөгжүүлэх, нийгэм, эдийн засгийг төгөлдөржүүлэх, иргэдийн аж амьдралыг дээшлүүлэхийн төлөө, авлигатай тэмцэхийн төлөө иргэн бүрийг Монгол Улсын хөгжилд идэвхтэй оролцуулахын төлөө ажиллах мөрийн хөтөлбөртэй оролцоно.

     Бид 30 жилийн ардчиллыг ардаа үлдээлээ. Ирэх 30 жилд яаж амьдрах вэ, дэлхийд ямар байр суурь эзлэх вэ, хүүхэд багачуудад ямар өв үлдээх вэ зэрэг шинэ сонголтын өмнө ирж байна. Монгол Улс туулсан замналаа эргэн харж, шинэ үедээ итгэж, Монгол Улсын Үндсэн хуулийн дагуу монгол төрийн нэгдмэл байдлыг хадгалж, гадаад бодлогуудыг өвлөж, монголын ард түмний төлөө зүтгэхээр сэтгэл шулуудаж байна. Энэ сонгуулиар нээлтэй, шударга олон хүнд хүрч ажиллах болно. Монголчууд шинэ мөрөөдөлтэй шинэ замаар явна гэдэгт итгэж байна. Тийм учраас нам бус инженер намайг энэ эвслээс тодруулсан.

      Хэрвээ би Ерөнхийлөгчөөр сонгогдвол нам, нас хүйс үл харгалзан монголын хамгийн чадвартай, туршлагатай хүмүүсийг оролцуулсан шинэ баг байгуулан ажиллах болно. Энэ нам нэг намын бус монголын баг байх болно. Тийм учраас би иргэдэд болон өөрсдөдөө итгэж байна. “Монголчууд бид чадна” гэсэн уриатай сонгуульд оролцож байгаа. Бид хичээж, зүтгэх болно” гэлээ.