УИХ-ын гишүүн Б.Энхбаяр мэдээлэл хийлээ.

  Тэрбээр "Ерөнхий сайд нүүрсний хулгайтай тэмцэх ажлыг эрчимжүүлэх ажлын хүрээнд намайг Хууль зүй, дотоод хэргийн сайдад томилж байгаагаа мэдэгдсэн. Улмаар Монгол Улсын Ерөнхийлөгчид танилцуулж, УИХ-д танилцуулах процесс өнөөдөр болно. Тиймээс УИХ дээр танилцуулагдсаны дараа ажлаа хүлээж аваад, дэлгэрэнгүй улс төрийн мэдэгдэл хийнэ. Юуны урьд бол өчигдөр манай намын Хяналтын хороо үүр шөнийн заагаар хуралдаж, миний биеийг МАН-аас хөөсөн тухай мэдээллийг би хэвлэлээс сонссон. Энэ бүтэц бүрэлдэхүүн бол нэгдүгээрт, Үндсэн хуулийн эрх зүйн чадамжгүй. Хоёрдугаарт, энэ Хяналтын хорооны таван хүн нь 2023 оны арванхоёрдугаар сард УИХ-аас зохион байгуулагдсан нүүрсний хулгайтай холбоотой сонсголд гэрчээр дуудагдаж байсан хүмүүс байна. Би нүүрсчдэд хөөгдөхгүй. Нүүрсчдийг эх орноос нь хөөнө. Энэ өдрүүдэд их олон зүйл тодорхой болж байна. Учир нь, хэн нь нүүрсчид, хэн нь нүүрсний хулгайтай холбоотой юм гэдэг асуудал улам тодорхой болж, өөрсдөө илчлэгдэж байна. Энэ ямар хэмжээний улс орныг хэрсэн, эрх мэдэл сүлжсэн, худалдаж авсан, ямар ч үнээр хамаагүй эрх мэдлийн оройд залрахаар улайрч байгаа гэдгийг энэ өдрүүд илчилж байна. Тиймээс би Ерөнхий сайдын хэлсэнчлэн нүүрсний хулгайтай тэмцэнэ гэдэг цалин, тэтгэвэр тэтгэмж, хүүхдүүдийн сурах боломж, Монголын ирээдүйг хулгайлж байгаа хулгайчидтай хийх тэмцэл гэж ойлгох ёстой" гэв.