Монгол Улсын Ерөнхий сайд Г.Занданшатар цаг үеийн асуудлаар мэдээлэл хийлээ. Тэрбээр "2025 оны долдугаар сарын 9-нд "Эрдэнэс Тавантолгой" ХХК-д онцгой дэглэм тогтоож, хяналт шалгалтын ажлыг эхлүүлж, нүүрсний хулгайтай тэмцсэн ажлынхаа үр дүнг дүгнэж байна. Эдийн засгаа сэргээхийн тулд нүүрсний хулгайтай тэмцэхээр ажлаа эхлүүлсэн. Эдийн засгаа сэргээнэ гэдэг нүүрсний хулгайтай тэмцэнэ гэсэн үг. Нүүрсний хулгайтай тэмцэнэ гэдэг бол эдийн засгаа сэргээнэ гэсэн үг. Намайг Ерөнхий сайдаар томилогдоход төсөв 3.3 их наяд төгрөгөөр тасрах эрсдэл үүссэн байсан. Эдийн засгийн өсөлт 2.4 хувь болж унасан. Энэ бол нүүрсний үнэ буурсантай холбоотой. Ерөнхий сайдаар ажиллаж эхлээд улсын төсвийг анх удаа 2.2 их наядаар хэмнэсэн төсвийн тодотголыг хийсэн. Өнөөдрийн байдлаар эдийн засаг сэргэсэн. “Эрдэнэс Тавантолгой”-д онцгой дэглэм тогтоосны үр дүнд борлуулалтын орлого 1.6 дахин өссөн. Экспорт 1.2 дахин, үр ашиг нь гурав дахин, орлого 1.3, олборлолт 1.1 дахин өссөн. Энэ бүхэн тэнд бугшсан байсан хулгайтай тэмцсэний үр дүн юм. Эдийн засаг 5.7 хувь болж өсөж байгаа. Тухайн үед нүүрсний хулгайн маш олон арга хэрэгслүүд тэнд ил тод болсон. Түүний нотлох баримтыг АТГ- руу шилжүүлсэн. Нүүрс баяжуулах үйлдвэрийг нэг их наяд төгрөгөөр барьж байгуулсан. Тэр үйлдвэрийг яагаад 18 километрийн цаана байгуулсан бэ гэдэг нь асуудал дагуулсан. Тэр хооронд 1.5 сая төгрөгөөр тээвэр хийдэг байсан. Харин онцгой дэглэм тогтоосноор 400 мянга болж хямдарсан. Биднийг уурхай дээр очиж ажиллахад энэ мэтчилэн хулгайн олон асуудал яригдаж байсан. Бүгдийг нь таслан зогсоож АТГ-т шилжүүлсэн. Бортээгийн уурхайн аман дээр баяжуулах үйлдвэр барьсан ч түүнийгээ ашигладаггүй үрэлгэн замбараагүй байдалтай байсан. Ийм учраас нүүрсний хулгайг бүр мөсөн таслан зогсоож эдийн засгаа сэргээхийн тулд тэнд байгаа орд газруудыг сайжруулах шаардлагатай. Иймээс Монгол Улсын төсөвтэй хамт эдийн засгийн эргэлтэд ороогүй байгаа цорын ганц орд болох Бортээгийн ордыг эдийн засгийн эргэлтэд оруулах тухай УИХ-ын тогтоолын төслийг УИХ-ын төсөвтэй хамт УИХ-д өргөн барьсан. Бортээгийн ордыг ашиглах тогтоол өргөн барьмагц УИХ-ын дарга Д.Амарбаясгалан нэр дэвшихгүй гэж байсан. Өөрөөр хэлбэл, гурван сарын өмнө нэр дэвшихгүй гэж байсан дарга яаран сандарч, нэр дэвших мэдэгдэл хийж эхэлсэн. Залуучууд нүүрсний хулгайтай тэмцэхийг шаардаж, талбай дээр жагсаж байсныг хүн бүхэн санаж байгаа. Тухайн үед УИХ, Засгийн газар тухайн үед нээлттэй сонсгол зохион байгуулж байсан. Би УИХ-ын даргыг нүүрсний хулгайн тэмцэлд хамтран зүтгэнэ гэж итгэж байсан. Нүүрсний хулгайд холбогдсон гэдэгт нь итгэхийг хүсээгүй. Харамсалтай нь, УИХ-ын дарга энэ асуудалд нэр холбогдсон байсан. Эв нэгдэл шударга ёсон дээр тулгуурлах ёстой. Тиймээс Монгол Улсын Ерөнхий сайд би Монгол Улсын Үндсэн хуульд заасан онцгой бүрэн эрхийнхээ дагуу УИХ-ын гишүүн Б.Энхбаярыг Хууль зүй, дотоод хэргийн сайдаар томилж байгаагаа ард түмэндээ мэдэгдэж байна. Нүүрсний хулгайтай хийх тэмцлээ илүү эрч хүчтэй, эрс шийдэмгий үргэлжлүүлэхийн тулд Б.Энхбаярыг Хууль зүй, дотоод хэргийн сайдаар томиллоо” гэв.