УИХ-ын гишүүн, Ёс зүй, дэгийн байнгын хорооны дарга Б.Баярбаатар цаг үеийн асуудлаар мэдээлэл өглөө. Тэрбээр “УИХ-ын эмэгтэй гишүүд маань хувьчилж уулзаад үзэл бодлоо илэрхийлж байгаа. УИХ-ын гишүүн М.Нарантуяа-Нара гишүүнээс холбогдож тайлбар аваад хурлаар оруулж асуудлыг шийднэ. Ёс зүйн дүрмийн дагуу сануулга арга хэмжээг авсан. Иргэдийн зүгээс үүнийг хариуцлага болохооргүй, хөнгөн байна гэж байгаа ч хариуцлага тооцуулж буй хүнд их хүнд тусдаг. Сайжруулах шаардлага байгаа ч сул гэж би хардаггүй. УИХ-ыг гишүүн Б.Энхбаярыг хөөх асуудал хэд хэдэн удаа яригдсан. Өмнөх бага хурал дээр Б.Энхбаяр гишүүнийн гаргаж байгаа үйлдэл намын гишүүний ёс зүйд нийцэхгүй, хяналтын байгууллага анхаарал, арга хэмжээг авах хэрэгтэй хэмээж байсан. Хөөх шаардлага хангасан гэж хэлэхэд хэтэрсэн гэж хувь хүнийхээ байр сууринаас харж байна. Хяналтын хороо маань 21 гишүүнтэй. Бид асуудлыг хамтдаа шийдэх учраас урьдчилж би асуудлыг шийдэж байгаа мэт хэлж болохгүй. Өнөө өглөө 100 гаруй гишүүний гарын үсэг бүхий Б.Энхбаяр гишүүнийг намаасаа хөөх шаардлагыг хяналтын ерөнхий хороонд Бага хурлын гишүүдээс ирүүлэх гэж байгаа гэсэн мэдээлэл авсан. Гар дээр аваагүй байгаа” гэлээ.