2026 оны төсвийн төслийг хэлэлцүүлгээс УИХ дахь Ардчилсан намын бүлэг өнгөрсөн баасан гарагт завсарлага авсан. Үүнтэй холбоотой УИХ-ын дэд дарга Х.Булгантуяаг хууль зөрчиж завсарлага өгсөн үү гэдэг асуудал үүсээд буй.

      Энэ талаар УИХ-ын Тамгын газрын Ерөнхий нарийн бичгийн дарга Б.Баасандорж мэдээлэл өглөө. Тэрбээр "Өнгөрсөн баасан гарагийн чуулганы хуралдааныг УИХ-ын дэд дарга Х.Булгантуяа даргалж, 2026 он төсвийн төслийг хэлэлцүүлж байх үедээ хуралдааны дэгийн ямар ч зүйл заалтыг зөрчөөгүй. Бүх процесс дэгийн дагуу явж байгаа. Намрын чуулган есдүгээр сард эхэлж, төсвийг таван үе шаттай хэлэлцүүлдэг болсон. Чуулган эхэлмэгц төсвөө хэлэлцэж эхэлсэн. Улмаар УИХ дахь Ардчилсан намын дарга О.Цогтгэрэл төсвийн хэлэлцүүлгээс завсарлага авсан. Дараа нь Ардчилсан намын бүлгийн дэд дарга Б.Жаргалан тодорхой үндэслэлээ хэлээд завсарлагын хугацаагаа сунгах хүсэлт тавьсан. Ингээд хуульд зааснаар хуралдаан даргалагч гурав хоног завсарлагын хугацааг сунгах үүрэгтэй байдаг. Энэ процессын дагуу өрнөсөн. Тэгэхээр УИХ-ын дэд дарга Х.Булгантуяа УИХ-ын болон УИХ-ын дэгийн тухай ямар ч зүйл заалтыг зөрчөөгүй" гэлээ.