УИХ-ын чуулганы ээлжит хуралдаан өнөөдөр болсон. Энэ үеэр УИХ-ын гишүүн П.Батчимэг "Монгол Улсын ирэх жилүүдийн макро эдийн засгийн нөхцөл байдал, төсвийн бодлогын талаар энэ намрын чуулган нээгдээд хоёр өдөр бид ярилцлаа. Намрын чуулган эхэлсэн өдрөөс эхлэн манай намын завсарлага авсан гол шалтгаан нь Хөгжлийн дунд хугацааны бодлого буюу Монгол Улсын ирэх таван жилийн хөгжлийн төлөвлөгөө хэлэлцэж батлаагүй байхад дунд хугацааны төсвийн хүрээний мэдэгдлийн төсөл, тэр хүрээний төсвийн орлого, зарлага, тэмцлийн талаарх хоёр, гурван жилийн төлөвлөгөөг ярьж эхэлж байгаа нь зарчмын хувьд буруу гэж үзэж байна. Хөгжлийн бодлого, төлөвлөлт, түүний удирдлагын тухай хуулийн 4.1.6-д "Монгол Улсыг хөгжүүлэх таван жилийн үндсэн чиглэл, Монгол Улсын урт хугацааны хөгжлийн бодлогыг хэрэгжүүлэхэд чиглэсэн хөгжлийн зорилтот хөтөлбөрт нийцүүлсэн улс, салбар, салбар хоооронд болон бүс орон нутгийн уялдааг хангасан зорилго, зорилт, хүрэх үр дүн нөөцөд суурилан боловсруулсан, төсөл арга хэмжээг агуулсан улсын хөрөнгө оруулалтын хөтөлбөр тоон болон чанарын шалгуур үзүүлэлт бүхий дунд хугацааны нэгдсэн төлөвлөлтийн баримт бичгийг" гээд заачихсан байгаа юм. Ирэх жилүүдийн хөгжлийн бодлого, чиглэл, стратеги тодорхойлоогүй байж төсөв, санхүү, хөрөнгө оруулалт яриад, хувиарлаад сууж байгаа нь гайхал төрүүлж байна. Хэрэв хувийн хэвшилд та бүхэн ажиллаж байсан бол хэзээ ч ийм зүйл хийхгүй байх гэж бодож байна. Энд нэг бол Төсвийн тогтвортой байдлын тухай хуулиндаа өөрчлөлт оруулах ёстой. Ингэж байж хөгжлийн төлөвлөлт, төсвийн хүрээгээ баталж сурах хэрэгтэй байна. Сайд нар ирэх жилийн төсвийн төслөө боловсруулаад УИХ-д танилцуулж байна. Гэтэл төсвийн төсөл нь тэтгэвэр нэмэх 6 хувь, НӨАТ, буцаан олголт 2-5 хувь гэснээс өөр онцгой зүйл харагдахгүй байна. Эдгээр нэмэгдлүүд чинь нэг хүнд 100 мянган төгрөг ч хүрэхгүй. Тэгээд энэ инфляцад идэгдээд ямар ч үр дүнгүй болно. Үүнийгээ л их том зүйл, шинэчлэл, реформын эхлэл гэх мэтээр яриад байж болохгүй" гэв.