Ардчилсан намын арслантай тамгыг УИХ-ын гишүүн “Тэсо”-гийн босс О.Цогтгэрэл дөрвөн жил атгах нь тодорхой боллоо. Өөрөөр хэлбэл, Ардчилсан намын ҮБХ-аар дүрмээ шинэчлэн баталж, намын даргын сунгаанаа хийснээр О.Цогтгэрэл олонхын саналаар намын даргад дэмжигдсэн. Ингэснээр ирэх Ерөнхийлөгчийн сонгуульд намаа удирдаж орохоос гадна дараагийн УИХ-ын сонгуульд Ардчилсан намыг удирдах бүрэн эрх түүнд шилжиж байгаа гэсэн үг. Ийн хичээлийн  шинэ жилтэй яг давхцсан Ардчилсан намын даргын сунгаан намынхаа түүхэнд байгаагүй хамгийн том тавилттай жүжиг болж дууслаа. Ардчилсан намынхан зодоон намын даргын сунгаанаа хийсэнд нь ард түмэн алга ташаад байгаа юм биш. Харин ч ардчилсан нам дараагийн МАН болж, намынхаа гишүүдийн саналыг тэр чигээр нь хайрцагладаг босоо тогтолцоотой нам  болсныг харуулсан хамгийн тод жишээ байна.

     Уг нь Ардчилсан нам гудамжинд тэмцэж, гуйлга гуйхаар наагуур хоосорсон ч хамгийн дотоод ардчилалтайгаар намын даргаа сонгодог сайн талтай байлаа. Тэд тарж, бутарч, тайзан дээрээ зодолдож, саналын хайрцгаа булаацалдаж, зугтаж байсан ч өнөөдрийнх шиг хамгийн худлаа жүжгийг тавьж байсангүй. Фракцууд нь хоорондоо өрсөлдөж байж хамгийн сайн хувибарыг сонгож ирсэн нь Ардчилсан намынхны мөн чанар үнэт зүйл байв.

       Харамсалтай нь, энэ удаагийн Ардчилсан намын даргын сунгаан гэх тавилттай жүжигт эр, эм хөгшин залуугүй оролцож, ард түмний толгойг эргүүлэх ажилдаа дуу нэгтэйгээр оролцсон. Тэр тусмаа АН-ын залуу үеийн төлөөллийнхэн тун чадварлаг тоглосон гэхэд болохоор байна. Ингэхдээ УИХ-ын гишүүн Ч.Лодойсамбуу, О.Алтангэрэл, Л.Мөнхбаясгалан нар намын даргын сунгаанд нэр дэвшихээ зарлаж, олон нийтийн нийгмийн сүлжээнд хамгийн их талцуулсан. Ингэхдээ тэд Ардчилсан намын дүрэмд өөрчлөлт оруулна гэдэг шаардлагыг хамгийн их тавьж байлаа. Гэвч начир дээрээ намын дүрмийн шаардлагыг хангаагүй гэдэг шалтгаанаар намын даргад өрсөлдөх боломжгүй болж, хэд хоног олныг талцуулсан жүжгийн нэгдүгээр “үзэгдэл”-ийг маш сайн авч гарсан.

        Хоёрдугаар “үзэгдэл”-ийг Тагнуулын Ерөнхий газрын  дарга асан Б.Хурц дааж авсан гэхэд болно. Өөрөөр хэлбэл, Б.Хурцын эхнэр Ү.Сарнай “Миний нөхөр болон гэр бүлийн зүгээс Ерөнхийлөгч асан Х.Баттулгаас уучлал, өршөөл хүсээгүй. Харин өөрөө тийм үг дамжуулахад нь миний бие 2021 оны зургаадугаар сарын 22-ны өдөр ийм мэдэгдэл хүргүүлсэн байдаг юм. Миний нөхөр өөрөө болон бид гэм буруугүй гэж үзсэн хэвээр байгаа тул Монгол Улсын Ерөнхилөгчийн бүрэн эрхийн дагуу уучлал үзүүлэхгүй байхыг хүсье”. Бас шоронд хоригдсон орой нь Ардчилсан Ерөнхийлөгчөөс  хэргийн материалыг бүхэлд нь нууцаас гаргуулахыг хүссэн мессеж явуулсан байдаг” хэмээн цахим орчинд дуулиан тарьж амжсан. Цаашлаад Б.Хурц хэвлэлд өгсөн ярилцлагадаа “Х.Баттулга Л.Оюун-Эрдэнэтэйгээ нам байгуулаад яах хэрэгтэй” хэмээн мэдэгдэж байлаа.

        Гуравдугаар үзэгдлийг УИХ-ын Ө.Шижир найруулан “тавьсан". Ардчилсан намын даргад дэвших талаар А үсэг цухуйлгаагүй байсан тэрбээр нэр дэвшигчдийг бүртгэхтэй зэрэгцээд намын даргад өрсөлдөнө хэмээн мэдэгдэж, Дотоод сонгуулийн хороонд нэр дэвших хүсэлтээ хүргүүлсэн. Улмаар Дотоод сонгуулийн хороонд хүсэлтээ хүргүүлмэгцээ Ардчилсан намын даргын сунгаан 200 сая төгрөгийн дэнчинтэй, хэвлэлийнхнээ гаргаад 200 сая төгрөг өгөөд өрсөд гэсэнэ сенсацийг нийгэмд тарьж, цахим орчинд мэдэгдэж байлаа. Ингэснээр Ардчилсан намын даргын сунгааны дэнчингийн мөнгөө өгч чадалгүй намын даргын сунгаанаас хасагдсан дүртэй намын даргаас нэрээ татсан.

           Ардчилсан намын даргын сунгааны тавилттай жүжгийн хамгийн чухал дүрийг УИХ-ын дэд дарга Б.Пүрэвдорж, Ж.Баярмаа нар авсан гэхэд болно. Цахим орчинд хамгийн их талцал хуваагдлыг явуулж, тэр чинээгээр олны дэмжлэгийг хүлээж байсан тэд яг санал хуралттай зэрэгцээд л намын даргын сунгаанаас нэрээ татчихсан. Бүхэл бүтэн 200 сая төгрөгний дэнчингээр өрөлдөж, намын дарга болох мөрийн хөтөлбөр бодлого боловсруусан хэрнээ нэрээ татчихсан. Эндээс тэд О.Цогтгэрэлийг олон нийтэд хүлээн зөвшөөрүүлэх хамгийн гол ажлыг нугалсан  туслах дүрүүд болж байна. Туслах дүр хэдий чинээ үнэмшилтэй тоглоно гол дүр төдий чинээ олонд таалагдана гэсэн үг. Ийн Ардчилсан намынхан түүхэндээ байгаагүй хамгийн муу намын даргын сунгааныг хийлээ. Цаашлаад хамтарсан Засгийн газар унахаас эхлээд л Ардчилсан намын дараачийн дарга тодорчихсон байсныг улстөрчид удаа дараа сануулсан. Ард түмэн хүссэн ч эс хүссэн ч Ардчилсан намын дарга “Ах” намынхны захилгаар зурагддаг болсныг энэ сунгаан тодорхой харууллаа.