Ардчилсан намын дарга Л.Гантөмөр намын даргын тамга тэмдгээ хэнд хүлээлгэж өгөх вэ өрсөлдөөн өрнөж байна. Үнэндээ өнгөрсөн сонгуулиас өмнө тарж, бутарсан Ардчилсан намыг Л.Гантөмөр нэг тамгатай нэг даргатай, нэг дүрэмтэй болгоод хамтарсан Засгаас гармагцаа намын даргын суудлаа хүлээлгэж өгнө гээд ам гарчихаад байгаа юм. Ингээд Ардчилсан нам ҮБХ-ны хурлын товоо энэ сарын 28-нд буюу өчигдөр зарлаж, гурван өдрийн хуралдааны тов гаргасан. Өчигдрийн хуралдаанаар намын дүрмээ хэлэлцүүлж, намын даргын сунгаанаа хэрхэн зохион байгуулах үндсэн хэлэлцүүлгүүд явсан.

        Ардчилсан намынхан хэзээнээс нам дотроо фракцын зодоонтой түүнийгээ намын дотоод ардчилал байх ёстой үзэгдэл гэж тайлбарладаг. Фракцын хуваагдал намдаа гай тарих нь ч бий. Энэ удаагийн намын даргын сунгаанд Х.Баттулгын МоАХ, Ц.Элбэгдоржийн “ОД” фракц, МАН-ын артай гэх О.Цогтгэрэлийн “Нэг Монгол” фракц дунд өрнөж байна.

        Фракцынхныхаа дунд алтан дундаж бодлого баримталсан Л.Гантөмөр улс төрд унаж байсан Ардчилсан намын рейтингийг Ардын намаас ч илүү өсгөсөн гэх агуулгыг өчигдрийн хуралдааны үеэр хэвлэлд өгсөн яриандаа онцолсон. Харин Ардчилсан намын даргын сунгаанд МоАХ-ны талаас УИХ-ын гишүүн О.Алтангэрэл, Л.Мөнхбаясгалан нар дээр УИХ-ын гишүүн Ч.Лодойсамбуу нэмэгдсэн. “Нэг Монгол” фракцаас УИХ-ын гишүүн О.Цогтгэрэл, Ц.Элбэгдоржийн “Open Democrary” буюу “ОD” фракцаас УИХ-ын гишүүн Ж.Баярмаа нар өрсөлдөхөө мэдэгдсэн. Мөн Ерөнхийлөгч асан Ц.Элбэгдоржийн нутгийн дүү УИХ-ын дэд дарга Б.Пүрэвдорж нэр дэвших хүсэлтээ өгсөн. ҮБХ-ны хамгийн сүүлд баталсан дүрмээрээ Үндсэн дүрмийн 5.17.4-т “Намын даргад нэр дэвшигч нь Үндсэн дүрэм зөрчиж шийтгэл хүлээгээгүй, намд элсээд 10 жил болсон, тухайн үеийн хүчин төгөлдөр ҮБХ-ны нийт гишүүдийн 10 хувийн дэмжлэг авч, гарын үсэг зуруулсан, намын сонгуульт гишүүн (ҮБХ, ҮЗХ)-ээр 4-өөс доошгүй жил ажиллаж байсан гишүүн байна” гэсэн заалт хэрэгжиж байгаа юм. Улмаар өчигдрийн хуралдаанаар энэ дүрэмд өөрчлөлт оруулаагүй тул О.Алтангэрэл, Л.Мөнхбаясгалан, Ч.Лодойсамбуу нар Ардчилсан намын арслантай тамгын төлөө өрсөлдөх эрхгүй болжээ.

      Ингэснээр намын даргын сунгаан УИХ-ын гишүүн Ж.Баярмаа, О.Цогтгэрэл, Б.Пүрэвдорж нарын дунд өрнөхөөр болж байна. Эндээс УИХ-ын гишүүн О.Цогтгэрэл улс төр, бизнесийн талаасаа асар том дэмжлэгтэй яваа нь. Угтаа бол түүнийг МАН, АН гэх улс төрийн хоёр гол намд ноёрхлоо тогтоосон MCS-ын бүлэглэлийн хүн гэдэг. Нэг ёсондоо Л.Оюун-Эрдэнийн Засгийн газар унаснаас хойш MCS-ын бүлэглэлийнхэн хүчээ авсан. Цаашлаад Ж.Баярмаа ч энэ бүлэглэлд хамаардаг. С.Баярцогтоос эхлээд АН-ын томчууд ард нь байгаа учраас бас ч улс төрийн дэмжлэгтэй. УИХ-ын гишүүн Б.Пүрэвдоржийн хувьд улс төрд намынхаа бүлэглэлийнхэн дунд тал алдчихгүй явж ирсэн. Тойргоо тултал усалдаг ч нам дотроо дэмжлэг багатай нэгэн.

               Ардчилсан намын ҮБХ-ны хурлаар УИХ-ын гишүүн Ж.Баярмаа "Ардчилсан намын тухайд сүүлийн гурван сонгуульд харамсалтайгаар ялагдсан. Ялагдсаны үндсэн дээр намын дарга Л.Гантөмөр ажлаа өгөхөө илэрхийлсэн. Түүнээс хойш өнөөдрийг хүртэлх хугацаа багагүй байлаа. Тиймээс бид нэн яаралтай намынхаа удирдагчийг сонгох ёстой. Яагаад гэвэл үүний цаана улс их орны хөгжил, ард түмний амьдрал явж байдаг. Бид өнөөдөр нэгэнт сөрөг хүчин болсон бол сөрөг хүчнийхээ ажлыг жинтэй, чадамжтай хийж байж, төрд эрх барьж байгаа намын үйл ажиллагааг шүүмжилж, авч явж, улмаар үүний тусгал нь өнөө л Монгол Улсын хөгжил, Монголын ард түмний амьдрал сайжрах ёстой гэсэн асуудал. Тэгэхээр бид эхлээд удирдлагынхаа асуудлыг шийднэ. Өнөөдрийн Ардчилсан намын хүрээнд хүчин төгөлдөр байгаа дүрэм журмаа баримтална.  Улсад өнөөдөр асуудал бүрэн шийдэгдээгүй байна. Эсэргээрээ дандаа уруудах тийшээ явж байна. Эргээд харахаар бүх асуудал улс төрийн намд байна. Тэр улс төрийн нам өнөөдөр нам шиг нам болж чадахгүй байна. Тэгэхээр энэ улс төрийн намыг дотоод ардчилалтай, шударга, ёс суртахуунтай, үзэл баримтлалынхаа хүрээнд манлайллыг үзүүлдэг, тэмцдэг улс төрчид авч явах ёстой гэж боддог. Тэгэхээр би өөрийгөө энэ шаардлагыг хангаж байна гэх үндсэн дээр нэр дэвшсэн" хэмээн байр сууриа илэрхийлсэн.

        УИХ-ын гишүүн Б.Пүрэвдорж "Өнөөдөр нэр дэвших хүмүүсийг бүртгэх хороог байгуулна. Улмаар нэр дэвшигчдийг бүртгэх явц гурван өдрийн турш үргэлжилнэ. Ингээд 31-ний өдөр намын даргаа сонгохоор байгаа. Тодорхой журамтай учраас наана зарлах нь асуудалтай. ргэдийн амьдралыг сайжруулж, Ардын намын хулгайч нарыг дарж, 2028 онд АН-ыг ялуулахын тулд би намын даргад нэрээ дэвшүүлж байна" хэмээн мэдэгдсэн.

       Харин УИХ-ын гишүүн О.Цогтгэрэл хэвлэлд тодорхой байр суурь илэрхийлээгүй юм. Ардчилсан намын даргад нэр дэвшигчдийг өнөөдөр бүртгэж, ҮБХ-ны  хурлын гишүүдийн олонхын саналаар даргыг сонгож, Их хурлаараа батламжлах юм.